Иргэдийн жагсаал Сүхбаатарын талбайд арав дахь өдрөө үргэлжилж байна. Жагсаал хийж байгаа иргэд "Шударга эрүүл нийгмийг хүсэж байна", "Хулгайлагдсан хөрөнгөөр 2023 оны төсвийг бүрдүүл", "Нүүрсний хэрэгт холбогдсон хүмүүсийн нэрийг зарла" хэмээн эрх баригчдаас шаардсаар байгаа билээ. Жагсаалын эхний өдрөөс өнөөдрийг хүртэл үзэл бодлоо илэрхийлж буй жагсагчдын төлөөлөлтэй ярилцлаа. 

-Сайн байна уу? Та хэд дэх өдрөө жагсаж байна вэ?

-Сайн байна уу? Жагсаал эхэлсэн цагаас өнөөдрийг хүртэл жагсаж, үзэл бодлоо илэрхийлж байна даа.

-Жагсагчдыг нэгтгэж буй зүйл бол нүүрсний хулгайг ил гаргах, хариуцлага хүлээлгэх байгаа шүү дээ. Таны хувьд ямар шалтгаанаар жагсаж байна вэ?

-Тийм ээ. Мэдээж нүүрсний хулгайг эсэргүүцэж жагсаж байна. Үүний зэрэгцээ Засгийн газар шүүхийн шийдвэр биелүүлэхийг шаардаж байгаа юм. УИХ зарим газрыг тусгай хэрэгцээнд авсан. Гэтэл энэ тусгай хэрэгцээнд авсан талбайд үйл ажиллагаа явуулж байсан аж ахуй нэгж дахин үйл ажиллагаа явуулах боломжгүй, үндсэндээ газаргүй болж байна.

-Засгийн газар ямар шүүхийн шийдвэрийг биелүүлэхгүй байгаа юм бэ?

-Ашигт малтмал хайх, ашиглахыг хуулиар хориглосон талбайд тусгай зөвшөөрөл эзэмшиж байсан иргэний тусгай зөвшөөрөл нь цуцлагдсан тохиолдолд зөвхөн нөхөх олговор авах эрхтэй байдаг. Иймдээ ч УИХ тусгай хэрэгцээнд авахдаа нөхөн төлбөр олгох талаар тогтоол гаргасан. Гэсэн ч таван жилийн хугацаанд нөхөн төлбөрийн асуудлыг шийдвэрлээгүй өнөөдрийг хүрч байна. Өөрөөр хэлбэл, ААН-ыг үйл ажиллагаа явуулах боломжгүй болгосон атлаа хохирлыг төлдөггүй. Үнэндээ, бид хуультай улсад амьдарч байна уу гэж бодоход хүрч байгаа юм.

-Тэгэхээр та нөхөн төлбөр олгох талаар хуулийн байгууллага, шүүхэд хандсан хэрэг үү?

-Тийм ээ. Аргаа барахдаа нөхөн төлбөрийг дүйцүүлэн авах талаар хандсан. Ингээд дүйцүүлэн авах тухай шүүхийн шийдвэрүүд гарсан. Гэсэн ч өнөөдрийг хүртэл тухайн шүүхийн шийдвэрийг биелүүлээгүй. Шүүхийн шийдвэрийг хүртэл биелүүлдэггүй том толгойтой дарга нар хуулийг гууль болгож байна. Уг нь шүүхийн шийдвэрийг заавал биелүүлэх үүрэгтэй.

-Салбар яамдаа хандаж үзсэн үү?

-Үзэлгүй яах вэ. Уул уурхайн ААН-ийн үйл ажиллагааг төр ялгаварлан гадуурхаж байна. Саяхан сайд эмэгтэй “улны айлууд” гэж хэлээд огцорсон гол шалтгаан ялгаварлан гадуурхалт байсан шүү дээ. Үүнтэй л адил. Уул уурхайн салбарын ААН-үүдийг гадуурхаж байна хэмээн харж байгаа. Бусад салбарт шүүхийн шийдвэр гарлаа л бол шууд биелүүлдэг. Харин энэ салбарт л шүүхийн шийдвэрийг биелүүлдэггүй. Одоо хэнд хандахаа мэдэхгүй байгаа учир талбай дээр гарч байна.