УБТЗ-ын Тээвэр зохицуулалтын албаны орлогч дарга С.Батдөлийг цагдан хорих эсэхийг Баянгол дүүргийн шүүхэд хэлэлцэж, нэг сар цагдан хорих шийдвэр гаргалаа. 

Шүүх хуралдааны үеэр тэрбээр "Шүүхийн шийдвэр гараагүй байхад  хүнийг цахимаар ялладаг процесс Монголд үүссэн байна. 

Надад үүсээд байгаа хэрэг цагдан хорих шаардлагагүй хөнгөн гэмт хэрэг гэж ойлгосон. Заавал цагдан хорих шаардлагагүй явуулдаг. Гэтэл намайг цагдан хорихоос өөр аргагүй байдалд оруулж цахим орчноор маш их сэвэлтийг зохион байгуулалттайгаар хийлээ.

Мөн шүүх рүү хүртэл зохион байгуулалттайгаар дайрсан. Миний бие эхнэр, дөрвөн хүүхдийн хамт амьдардаг. Төмөр замд 14 жил ажилласан. Эндээс оргон зайлах асуудал огт байхгүй.

Би залуу хүн цаашдаа ч энэ асуудлыг шийдхийн төлөө явна. Миний том охин 13 настай, хамгийн бага нь гурван настай. Миний дөрвөн хүүхэд дөрвүүлээ хатгаа ханиадтай байгаа. Эхнэр маань эмнэлэгт хэвтсэн. Миний охин цахим мэдээллийг хараад  сүүлийн хоёр гурав хоног нүдээ бүлцийтэл уйллаа. Би охиныхоо сэтгэлзүйн байдалд маш их санаа зовж байна. Ангийнхан нь группүүдээсээ хассан.

Ийм байдалтай хүүхдүүдээ үлдээгээд явна гэхээс санаа зовж байна. Ийм учраас хувийн батлан даалтаар шалгуулах хүсэлтэй байгаагаа илэрхийлж байна" гэв. 

Б.Мичидмаа