Төмөр замын ҮЭХ-ноос Зам, тээврийн хөгжлийн сайд С. Бямбацогтод УБТЗ-д үүссэн авлига, албан тушаалын гэмт хэрэг, ажлын байрны дарамт, хүчирхийлэл, цалин хөлс зэрэг асуудлуудаар шаардлага хүргүүлж  ҮЭХ-ны дарга Б.Баяраа мэдээлэл өглөө.

Тэрбээр “Бид нар хэвлэлийн бага хурал дээр ч ярьж байсан үеийн үед  сонгуулийн жилд бүрэлдэхүүн нь солигдож байдаг. Энийг дагасан хөдөлгөөн маш их урсдаг, орон тоонууд янз янзын шалтгаанаар нэмэгддэг.

Хоёрдугаарт ажлын байрны дарамтын асуудлууд төмөр зам дээр байсаар байна. Таслан зогсоохдохгүй, энэ хүмүүс дээр арга хэмжээ авагдахгүй байна. Шинэ хөдөлмөрийн хуулинд орсон заалтыг биелүүлэхгүй байна. Шинэ хөдөлмөрийн хуулинд 6 дугаар заалтаас нь эхлээд ялгаварлан гадуурхахыг хориглоод, ажлын байрны дарамтуудыг үгүй хийх  анхаарч ажиллахыг биелүүлэхгүй байна.

Ер нь удирдах ажилтан, доод тушаалын ажилтны хооронд  энэ асуудал үүсдэг. Хүмүүсийн ажлын байрыг дураараа өөрчилдөг, үгүй бол өргөдлөө өгөөд гар гэх мэт.

Мөн бэлгийн сэдэлтэй, хүний эрхийн комиссоор баталгаажсан асуудлууд дээр арга хэмжээ авахгүй яваад байгаа асуудал байна. Мөн нүүрсний хулгайтай холбоотой вагоны асуудлууд нилээн хэдэн жилийн өмнөөс яригдаж байгаа. Цалин хөлсний хувьд цалин олгогч хуулийн хүрээнд, хуулийн хугацаанд  хамтын гэрээгээр цалингийн системийн шинэчлэлийг хийх үүрэгтэй. Бид нар хамтын гэрээний хүрээнд цалин орлогоо нэмэгдүүлэх  ажил хийж байгаа.  Төмөрзамчдын цалин дундаж цалинд ордог тийм ч бага биш. Гэхдээ мөнгө, ханшны уналт, инфляцийн өсөлтийг гүйцэж, хэрэгцээ хангаж чадахгүй байна” гэв. Мөн тус шаардлагыг энэ сарын 27-ны өдрийн дотор хариу өгөхгүй бол УБТЗ-ын ҮЭХ хуулийн дагуу ажил хаялт зарлана гэдгийг мэдэгдлээ.

Б.Мичидмаа