Засгийн газраас Хүүхдийн мөнгөн тэтгэмж, өрхийн нэгдсэн мэдээлэл цуглуулах аргачлалтай холбоотойгоор өнөөдөр /2023.01.17/ мэдээлэл хийлээ. Энэ үеэр ХНХЯ-ы дэд сайд С.Зулпхар цагийн үеийн асуудалд тайлбар өгөв. 

Тэрбээр “Бид урьд нь Хүүхдийн мөнгөн тэтгэмж олгохтой холбогдуулан айл, өрхүүдээр явж судалгаа хийдэг байсан. Гэхдээ мэдээлэл цуглуулах явц удаашралтай байдаг учраас зарим мэдээлэл удаж ирэх, хуучрах тохиолдол байдаг. Түүнчлэн шат шатны захиргааны байгууллагуудын мэдээлэл алдаатай, дутуу, шинэчлээгүйгээс болж алдаа үүсэж байгаа. Бид боловсруулах үедээ 50 мянга орчим мэдээллийг засварласан. Хэрвээ тухайн өрхийн өгсөн мэдээлэл алдаатай гэж үзвэл уг мэдээллийг засуулах хүсэлтийг гаргах шаардлагатай. Хүсэлтийн дагуу мэдээллийг холбогдох төрийн байгууллагад хүргүүлнэ. Алдаа үүссэн гэх мэдээллийг иргэн өөрөө засварлана. Үүнийг шуурхай зохион байгуулж ард нь гарна гэдгийг хэлье.

Нэгдүгээрт шинэ аргачлал тооцоход алдаа гарч магадгүй гэдгийг мэргэжилтэн, судлаачид өмнө нь хэлж байсан. Аливаа аргачлалыг хэрэглэх явцад тодорхой алдааны магадлал байдаг. Хоёрдугаарт энэ алдаа нь аргачлалаас шалтгаалсан гэхээс илүү мэдээллийн алдаатай байдлаас үүссэн байж болзошгүй гэх үүднээс журамласан байгаа. Засгийн газраас хүүхдийн мөнгөн тэтгэмж олгохтой холбоотой харилцааг зохион байгуулалтын түвшинд журамласан.

Үүнд, хэрэв мэдээлэл алдаатай гэж үзвэл засварлах аргыг журмаар зохицуулсан. Ташаа мэдээллээс үүдэлтэй алдаа гарч магадгүйг ямар ч аргачлалд тооцоолсон байдаг. Иймээс зохион байгуулалтын түвшинд журмаа боловсруулаад бэлэн болгосон гэдгийг хэлье. Одоогийн хэрэглэж буй аргачлал бол бидний өмнө нь ашиглаж байсан аргыг шинэчилсэн хэлбэр. Өмнөх аргачлал дээр өрхийн орлогыг тооцохтой холбоотой зарим нэг өрхийн ахуйн хэрэглээний эд хогшлыг үнэлдэг байлаа. Гэвч энэ нь бодит үнэлгээг гажуудуулдаг гэх шүүмжлэл их байсан. Үүний дагуу ажлын хэсэг гарч, тус аргачлалыг шинэчлэх ажлыг зохион байгуулж, нэг жил гаруй хугацаанд хийсэн. Ингэснээр айл болгоноор явж судалгаа хийдэг байсан туршлагыг халсан гэж хэлж болно. Өмнө нь судалгааны үр дүн зарим тохиолдолд жилийн дараа гардаг байсан. Харин одоо цахимаар буюу таван байгууллагын мэдээллийн санд тулгуурласан байдлаар өрхийн амьжиргааны түвшнийг үнэлдэг болсон. Энэ нь мэдээлэл цуглуулах, судлах ажил илүү боловсронгуй болж байгаагийн нэг илрэл.

Б.Мичидмаа