Манай улсад "Хүүхдийн мөнгөн тэтгэмж"-ийг 1.2 сая хүүхэд авдаг гэх тоон мэдээллийг Нэгдсэн Үндэсний байгууллагын хүүхдийн сангаас өглөө. Сүүлийн өдрүүдэд хэвлэлийнхний гол сэдэв болоод буй "Хүүхдийн мөнгөн тэтгэмж"-ийн шинэчилсэн журмаар зарим өрхийн мэдээлэл алдаатай байгаа гэх дуулиан дэгдсэн. Өрхийн амьжиргааны түвшингээр зааглан уг тэтгэмжийг олгох нь зүйтэй хэдий ч "хүүхдийн мөнгө" гэчхээд өрхийн амьжиргааны түвшинг харгалзан үзэж байгаа нь "эцэг эхийн мөнгө" гэж буй мэт ойлголтыг шууд өгч байна. Тэгвэл бид та бүхэнд хүүхдийн мөнгөн тэтгэмжийг хэрхэн үр дүнтэй зарцуулж болох тухай 10 зөвлөгөөг хүргэж байна. 

• Та уг мөнгөөр хүүхдээ сургалтад хамруулж болно. Орчин цагт хүүхдийг хөгжүүлэх олон төрлийн хэлний болон спортын сургалтууд хичээллэх болсон. Цаг үеэ дагаад хүүхдүүдийн хүсэл, сонирхол ч өөрчлөгдөж, ирээдүйд хэн болохоо эртнээс тодорхойлдог болсон. 
• Хүүхдийнхээ мөнгийг өөрт нь өгч, бие даан худалдан авалт хийхэд сурга. Хүүхэд бүхэн ирээдүйд бие даасан хувь хүн болно. Эцэг эхчүүдийн дунд ажиглагддаг буруу хэвшлүүдийн нэг нь хүүхдийнхээ өмнөөс шийдвэр гаргасаар, тэднийг ирээдүйд өөртөө итгэлгүй, бие даах чадваргүй нэгэн болгох гээд байдаг. Хэрвээ та хүүхдээ тийм хүн болгохыг хүсэхгүй байвал түүнд өөрөө шийдвэр гаргах боломжийг олгож байгаарай. 
• Хуримтлал үүсгэ. Уншигч та бүхний дунд хүүхдийнхээ мөнгийг ирээдүйнх нь сайн сайхны төлөө хуримтлуулж яваа олон эцэг, эх байгаа гэж найдаж байна. Хэрвээ та тэгдэггүй бол бидний зөвлөгөөг дагаад үзээрэй. Та сар бүр хуримтлал үүсгэж чадвал хамгийн энгийнээр бодоход таны хүүхэд ирээдүйд их сургуульд элсэх, байрны урьдчилгаа хийх, техник хэрэгсэл худалдаж авах зэрэгт нь тус нэмэр болж л таарна. 
• Дагуулаад номын дэлгүүр хэс. Ном уншина гэдэг сэтгэхүйгээ тэлэх хамгийн том боломж. Гэвч ихэнх хүүхэд ном унших төрөлхийн сонирхолтой төрдөггүй. Иймд та хүүхдэдээ ном уншихыг зөвлөж, түүнд үлгэрлэн номын дэлгүүр хамт хэсэж, сонирхсон номоо худалдан авах боломжоор нь хангаарай. Ном уншиж өссөн хүүхэд ирээдүйд гэмт хэрэгт холбогдох, буруу хүн болох эрсдэл багасдаг болохыг зарим эх сурвалжид мэдээлсэн байдаг. 
• Амралтын өдрөөр хүүхэдтэйгээ хамт хөгжилд. Нийгэм дэх болж, бүтэхгүй байгаа асуудал, хичээлийн даалгаврын дарамт, нийгмийн харилцаанаас үүсдэг олон асуудлуудаас болж хүүхдүүд хүртэл стресс, бухимдлаар бяцхан зүрхээ зовоож яваа. Тэгвэл хүүхдээ дагуулж гадагш гараад кино үзэх, тэшүүрээр гулгах, цанын бааз орох, дэлгүүр хэсэх, тоглоомын төв орох зэргээр цагийг зугаатай өнгөрүүлж, тэдний стрессийг тайлж болох юм. 
• Агаарт гар. Хүүхэд бүхэн эрүүл, аюулгүй орчинд бойжих эрхтэй. Гэвч агаарын бохирдлоор жишээ татахад тэдний эрх хамгийн ихээр зөрчигдөж байгаа. Тэгвэл та хүүхэдтэйгээ хамт ууланд алхаж, хотоос зайдуу агаарт гарч нэг өдрийг ч болов эрүүл байхад зориулаарай. Арван өдрийн утааны хорны ерөндөг нь нэг өдрийн цэвэр агаар.
• Сонирхлыг нь дэмж. Хүүхэд бүхэнд өөрийн гэсэн дур, сонирхол бий. Тэгвэл уг мөнгөөр сар бүр тэдний сонирхлыг дэмжихэд зарцуулж болох юм. Жишээлбэл, таны хүүхэд өөрийн гараар комик бүтээхийг хүсдэг бол зурах хэрэгслээр нь хангаж өгөхөд энэ мөнгө хангалттай хүрнэ. 
• Шүдний эмчилгээнд нь зарцуул. Сүүлийн жилүүдэд хүнсний аюулгүй байдал алдагдаж, хүүхдүүд хэт чихэрлэг бүтээгдэхүүн хэрэглэснээс шүд хорхойтох, буруу ургах зэрэг эмгэгүүд ихээр тохиолдох болжээ. Тэгвэл та өөрийн хүүхдээ сар бүр эмчийн үзлэгт хамруулж, зохих эмчилгээг нь хийлгээрэй. 
• Амьтан үрчилж ав. Судалгаагаар багадаа амьтан тэжээж, асарч тойлдог байсан хүн ирээдүйд сайн үйлс хийдэг, өрөвч зөөлөн сэтгэлтэй, сайн хүн болдог нь тогтоогджээ. Тэгвэл та хүүхдэдээ нохой, муур, усан гахай зэрэг сонирхсон амьтныг нь авч өгч болно. Хэдийгээр тэднийг зарах, борлуулах нь муу үйл хэрэг ч, тийм хүмүүс үгүй болохгүй учир өрөвдмөөр амьтдын нэгийг нь ч болов сайхан сэтгэлээр гэр бүлдээ элсүүлж, хүүхдээ сайн хүн болоход хөрөнгө оруулаарай. 
• Эрүүл хүнс худалдаж аваарай. Дээр хэлсэнчлэн хүүхэд бүхэн эрүүл байх эрхээр хангагдах ёстой. Та өөрийн хүүхдийн эрүүл мэндэд санаа зовнидог нь мэдээж хэрэг. Тэгвэл эрүүл мэндийг нь дэмжих органик хүнсний бүтээгдэхүүнээр хангаарай. Мөн та ханиад томуу, элдэв өвчлөлөөс сэргийлж, дархлааг нь дэмжин олон төрлийн витаминуудыг худалдан аваарай. Далайд дусал нэмэр, дархлаанд витамин нэмэр шүү. 

Л.Сайнаа