Д аминдэм нь бие махбод дахь кальцийн солилцоог зохицуулж, цусан дахь кальцийн түвшинг хэвийн хэмжээнд барих үйл ажиллагааг гүйцэтгэсэнээр ясны бүтэц, хэвийн үйл ажиллагааг хангаж байдаг. Түүнчлэн Д аминдэм нь ясны бүтцэд оролцдог фосфор, магнийн солилцоог ч давхар зохицуулж байдаг гэх мэт тоочоод баршгүй олон эерэг үр нөлөөтэй.
2016 онд Харвардын их сургуулийн судлаачдын хийсэн судалгаагаар Монгол оронд газар зүйн байрлалын улмаас нарны хэт ягаан туяа шууд газар дээр бус ташуу байдлаар тусдаг учир нарнаас арьсанд нийлэгжих витамин Д маш хангалтгүй байдаг гэж үзсэн. Иймд нар маш бага тусдаг өвлийн улиралд Д аминдэмийн дутагдалд орох эрсдэл үүсдэг байна.
Тэгвэл Австрали улсад хийгдсэн Д аминдэмийн хүнсний бүтээгдэхүүн орлуулалтыг судлах судалгаагаар өвлийн улиралд өдөр бүр нэг ширхэг өндгийг гурван сарын турш идсэн хүмүүсийн Д аминдэмийн түвшин огт бууралгүй, тогтвортой түвшинд байж чаджээ.Судалгаанд 25-аас 40 насны 51 хүн хамрагдсан ба тэднийг гурван өөр бүлэгт хуваасан байна. Өдөрт нэг буюу долоо хоногт долоон ширхэг өндөг идэж байсан бүлэг хүмүүст хангалттай үр дүн гарсан бол долоо хоногт 12 ширхэг арай бага тооны өндөг идэж байсан хүмүүст онцын нэмэлт ач тус гараагүй гэнэ.
Хүний бие махбод дахь Д аминдэмийн түвшин хангалтгүй байх нь ясны эрдэсжилтэд сөргөөр нөлөөлж, хүүхдийн өсөлт хоцрох, насанд хүрэгчдийн яс зөөлөрч сийрэгжин хугарах эрсдэлийг нэмэгдүүлдэг байна. Д аминдэм дутагдалын улмаас хүүхдэд рахит өвчин үүсэх бөгөөд хүүхдийн яс зөөлрөх, ясны хэлбэр өөрчлөгдөх шинж илэрдэг. Түүнчлэн Д аминдэм дутагдалтай холбоотойгоор дархлаа сулрах, цусны даралт ихсэлт, чихрийн шижин, зарим эрхтний хавдар зэрэг архаг өвчнөөр өвчлөх эрсдэл нэмэгддэг.Иймээс хүйтэн сэрүүний улиралд нэмэлт бүтээгдэхүүнээс гадна өдөр тутамд хэрэглэдэг хүнснээсээ Д аминдэмийг авах зайлшгүй шааpдлагатай юм.
Судалгааг харах бол ЭНД дарна уу,
Б.Мичидмаа
