Ээжүүдийн төлөөллөөс хүүхдийн мөнгө олголтын амжиргааны түвшин тооцоолох аргачлалд алдаа гарсан хэмээн үзэж шаардлага хүргүүлж байна. Энэ үеэр ээжүүдийн төлөөлөл н.Дөлгөөн мэдээлэл өглөө. 

Тэрбээр “Би Монгол улсны иргэний хувьд журамт болон зарчимт үүргээ биелүүлэхийн төлөө хэсэг бүлэг ээжүүдийг төлөөлөөд хүүхдийн мөнгөний араас явж байна. Бид хүүхдийн мөнгийг тэтгэмж биш гэж үзээд хүүхдийн мөнгийг тэгш ялгаварлахгүй олго гэж хүссэн боловч Засгийн газрын шийдвэрийн дагуу зорилтот бүлэгт шилжүүлж улсын хэмжээнд 91 хувьд олгох шийдвэр гарсан байна. Энэ 91 хувь, 9 хувь гэдгийг үндэсний статистикийн хорооноос гаргасан өрхийн амжиргааны түвшин тооцоолох аргачлалаар хийсэн гэдгийг мэдэж оллоо. Тэгвэл бид улсын хэмжээнд 91 хувь нь нэн ядуу зорилтот бүлгийн орон юм байна.

Би 91 хувьд багтаагүй, өрхдөө ганцаараа орлого олдог ээж. Над шиг мянга гаран өрх хандсан. Халамж очих ёстой хүндээ очихгүй байна. Миний өрхийн орлого 30-40 сая гэж гарсан. Энэ бол хамгийн том алдаа.

Даатгуулагчийн цалингийн бохир дүнгээр тооцсон байна. Бид нар хувь хүний орлогын албан татвар, нийгмийн даатгал, эрүүл мэндлийн даатгал зэрэг маш олон юм төлдөг. Яагаад гар дээр ирдэг цэвэр дүнг тооцохгүй байгаа юм. Энэ аргачлал бодит амьдралд нийцэхгүй, халамж бодит хүрэх ёстой хүндээ хүрээгүй. Өрхийн амжиргааны түвшнийг тооцох гол зорилт чинь нийгмийн халамжийг зорилтот бүлэг рүү хүргэх аргачлал гэсэн зорилго чинь биелээгүй байна. Улаанбаатар хотын шат шатны төрийн байгууллагууд авлигад автаад, ажлаа хийж чадахгүй байна гэдэг дээр шаардлага хүргүүлмээр байна. Хэрэв төрийн байгууллагууд ажлаа хийж чадахгүй бол олон улсын аудитад хандах ёстой” гэв.

Б.Мичидмаа