Эдийн засгийн бодлого, өрсөлдөх чадварын судалгааны төвөөс "Аймгуудын өрсөлдөх чадварын тайлан"-ийн үр дүнг танилцуулж байна. Энэ үеэр УЗ-ын дарга, П.Цагаан мэдээлэл танилцууллаа. 

Тэрбээр "Өрсөллдөх чадварын тайланг өнгөрсөн хугацаанд төр засаг, аймгийн удирдлагаас явуулсан бодлогын үр дүн гэж үздэг. Цаашид бодлого төлөвлөхдөө судалгаанд суурилж, түүндээ хяналт тавьдаг байхыг монголд нутагшуулахыг зүтгэж ирсэн.

Аймгуудын өрсөлдөх чадварыг засаглал, бизнес, дэд бүтэц, эдийн засаг гэсэн дөрвөн багц асуудлаар хэмждэг. Эдгээрийг дотор нь 174 шалгуураар хэмждэг.

• Эдийн засгийн тамир тэнхээгээр Өмнөговь аймаг,
• Бизнесийн үр ашгаар Дархан-Уул аймаг,
• Засаглалын үр ашиг болон дэд бүтцээр Дорноговь аймаг нэгдүгээр байрт эрэмбэлэгдсэн.

Аймгуудын өрсөлдөх чадварын ерөнхий онооны дундаж 65 болж өнгөрсөн жилээс зургаан оноогоор буурлаа.

Бизнес эрхлэгчдийн санал асуулт, ҮСХ-ны тайланд үндэслэн энэ судалгааг хийдэг. 21 аймгийн дундаж оноо 11 жилийн дараа 3 оноогоор нэмэгдсэн байна. Гэвч бизнес эрхлэгчдийн үр ашиг есөн оноогоор буурсан байна. Энэ бол маш буруу хандлага. Засаглалаас бусад нь буурсан. Жишээ нь Дархан Уул аймаг гуравдугаар байрт хэвээрээ боловч шилжилт хөдөлгөөн, гэмт хэрэг ихтэй.

Увс, Ховд, Баян-Өлгий аймгийн өрсөлдөх чадвар хамгийн их буурсан. Тухайлбал, авлига нэмэгдэж орон нутгаас аймгийн төв рүү чиглэсэн шилжилт нэмэгдсэн байна.

Завхан аймаг хоёрдугаарт хэвээрээ байгаад байна. Үүнд юу нөлөөлж байна вэ гэхээр удирдлагын бодлого, хог хаягдал, илт тод байдал зэрэг суларсан байна. Ухарсан үзүүлэлтээ таниж мэдээд, ажил үйлсээ сайжруулаад явах хөшүүрэг гэж ойлгох хэрэгтэй. Урагшилсан үзүүлэлттэй гарсан бол найр наадам хийгээд байх шаардлага байхгүй. 

Арван жил гэдэг бол урт хугацаа. 2012 онд өрсөлдөх чадварын тайлан гаргаж байхад өрсөлдөх чадварын зөрүү их байсан. Тэр зөрүү багассаар байна. Аймгуудын хоорондын зааг ялгаа багасаж байна гэдэг бол сайн үзүүлэлт. Өрсөлдөх чадварын судалгааны тайланг ашиглаж чадах юм бол саар зүйлээ сайжруулаад явах боломжтой. Орчин цагт хэмжих боломжгүй зүйл гэж байхгүй. Хэмжиж чадвал хянаж чадна. Хянаж чадвал удирдаж чадна. Удирдаж чадвал хөгжиж чадна. Тийм учраас аймаг орон нутгаа хөгжүүлье гэж бодож буй хүн бүр хэмжүүрийг ашиглаад хөгжүүлж болно" гэв. 

Д.Батчулуун