Хөгжлийн бэрхшээлтэй иргэд Улаанбаатар төмөр зам ХНН, Автотээврийн үндэсний төв, МИАТ ТӨХК-ийн нислэгээр үйлчлүүлэхдээ тарифын хөнгөлөлт эдлэх талаар мэдээлэл өгч байна. 

Мэдээлэлдээ "Өнөөдрөөс эхлээд "Улаанбаатар төмөр зам" ХНН олон улс, орон нутагт зорчиж буй хөгжлийн бэрхшээлтэй иргэдэд 60 хувийн хөнгөлөлт, түүнийг харгалзан яваа хүнд 40 хувийн хөнгөлөлт үзүүлнэ. 

МИАТ компанийн онгоцоор хөгжлийн бэрхшээлтэй иргэд зорчвол 50 хувийн хөнгөлөлт үзүүлэх шийдвэр гаргалаа. Эмчилгээнд явж байгаа тохиолдолд 50-90 хувийн хөнгөлөлт үзүүлнэ. 

Мөн Автотээврийн үндэсний төв 21 аймаг, 116 орчим сумд  үйлчилгээ хүргэж байна. Мөн олон улсын чиглэлүүд бий. Энэ чиглэлүүдэд хөгжлийн бэрхшээлтэй иргэд жилд нэг удаа зорчих эрхтэй болж байна. "Хүннү эйр" компани хөгжлийн бэрхшээлтэй иргэдэд 15 хувийн хөнгөлөлт үзүүлэхээр болсон. 

Энэ хөнгөлөлтүүдийг манай салбар нийгмийн хариуцлагын хүрээнд хөгжлийн бэрхшээлтэй иргэдэд үзүүлэх юм. Бид өмнө нь хөгжлийн бэрхшээлтэй иргэдэд зориулсан ухаалаг гарцыг тохижуулсан. Мөн тэргэцэнцэртэйгээ суугаад явах боломжтой бага оврын автобусыг явуулсан. Хөгжлийн бэрхшээлтэй иргэдэд зориулж вагоныг өөрчилж тохицуулсан. Бид цаашид эдгээр ажлуудаа үргэлжүүлээд явна. Энэ жил хөгжлийн бэрхшээлтэй иргэдийг ажлуулах чиглэлээр нэлээдгүй ажлыг зохион байгуулна. Манай харъяа байгууллагууд дээр 860-аад хөгжлийн бэрхшээлтэй хүн ажиллуулах ёстой хэмээн хуулиндаа заасан. Одоогоор 210 орчим хүн ажиллаж байна. Манай салбаруудад ажиллах боломжтой хөгжлийн бэрхшээлтэй иргэд хандаж болно" гэв. 

Д.Батчулуун