“Сая жуулчин хүлээж авахад бэлэн үү" хэвлэлийн хурлыг Байгаль орчин, аялал жуулчлалын яамнаас зохион байгууллаа. Энэ үеэр БОАЖЯ-ны сайд Б.Бат-Эрдэнэ мэдээлэл өглөө. 

Тэрбээр "Засгийн газраас аялал жуулчлалыг хөгжүүлэхэд эрхзүйн өөрчлөлт хийж, агаарын тээврийн либералчлал, улсын тусгай хамгаалалттай газар нутгийг аялал жуулчлалын чиглэлээр ашиглах зэргээр анхаарч байна. Тухайлбал, аялал жуулчлалын салбараас улсын төсөвт оруулсан хөрөнгө, үр өгөөжөө эргээд энэ салбар яагаад хүртэхгүй байна вэ гэдэг асуудал тулгарсан юм. 

“Монголд зочлох жил 2023-2025” стратегийн томоохон хөтөлбөрийг хэрэгжүүлж байгаа. Нэн тэргүүнд салбарын хуульд зоригтойгоор реформ хийж эхэлсэн.

Монголын нийт газар нутгийн 21 хувь буюу 32.7 сая га газар тусгай хамгаалалтад бий. Гэхдээ тэрхүү тусгай хамгаалалттай газрыг энэ чигээр нь хадгалахын зэрэгцээ эдийн засгийн эргэлтэд оруулах шаардлага үүсээд байна. 

Бид зорилтот зах зээлээ Япон, БНХАУ, БНСУ, ОХУ ба бусад улс гэж тодорхойлсон. Манай улсыг тойрсон гурван цагийн нислэгийн бүсэд 238 сая жуулчин бий. Тэдгээрийг насны ангиллаар нь авч үзэхэд 1983-2000 оныхон хамгийн их буюу 121 саяыг нь эзэлж байна. Тухайн жуулчид аяллынхаа маршрутыг гаргахдаа цахимаар төлөвлөж, төлбөрөө төлж, үйлчилгээ авдаг. Тэдний нэг хувийг эх орон руугаа татахад 1.2 сая жуулчин манай улсад ирэх боломжтой" гэв.