Манай сайтын цоо шинэ булан болох “Долоо хоногийн онцлох хүн” буланд уншигч та бүхэн тавтай морилно уу. Бид энэхүү буландаа тухайн долоо хоногт олны анхаарлыг татсан нэгнийг онцлох юм.  

Энэ долоо хоногийн онцлох хамт олноор Онцгой байдлын эрэн хайх, аврах багийн хамт олныг нэрлэж байна. 

БНТУ, Сири улсад газар хөдлөлт болсноос хойш зургаан хоног өнгөрчээ. Энэ хугацаанд газар хөдлөлтөд амиа алдсан хүний тоо 28 мянга давж, 12 мянга гаруй барилга байгууламж нуржээ. Иймд Турк, Сири улс бусад улс орноос аврах ажиллагаанд нэгдэхийг уриалсан бөгөөд улс орнууд нэгдсээр буй.

Энэхүү аврах ажиллагаанд оролцож буй цөөн хэдэн улсуудын нэг бол Монгол. Манай улсаас 35 хүн, хоёр нохойн бүрэлдэхүүнтэй баг хоёрдугаар сарын 8-ны өдөр Турк улсыг зорьсон билээ.

Аврах ажиллагаанд оролцоод өнөөдрийн байдлаар таван хүнийг аварч, 14 хүний цогцсыг гаргаж, 86 хүнд үзлэг оношилгоо хийгээд байна. Иймд манай улсад суугаа БНТУ-ын элчин сайд Зафер Атеш "Хүнд цагт аврах багаа илгээсэн цөөн хэдэн улсын нэг бол Монгол. Бидэнтэй хамт байгаа Монголчууддаа гүн талархал илэрхийлье" гэсэн юм. 

Манай улсын эрэн хайх, аврах багийн бүрэлдэхүүнд ОБЕГ-ын дэргэдэх Үндэсний аврах бригад болон Зэвсэгт хүчний жанжин штабын алба хаагчид үүрэг гүйцэтгэж буй. Мөн тус багт ОБЕГ-ын эрэлч нохойн албаны Марта, Балу дуудлагатай ноход багтаж байгаа. Харин Эрэн хайх, аврах бүлгийн багийг ОБЕГ-ын дэд дарга, бригадын генерал Б.Ууганбаяр ахлан үүрэг гүйцэтгэж байна. Бригадын генерал Б.Ууганбаярын хувьд 2015 оноос хойш ОБЕГ-т ажиллаж буй бөгөөд 2017 оноос ОБЕГ-ын дэд даргаар ажиллаж эхэлсэн юм. Тэрбээр аврах ажиллагаанд явахын өмнө өгсөн ярилцлагадаа "Бидний эрэн хайх ажиллагааны тэмдэглэгээ хүртэл нэг байх ёстой. Орос, Япон, Монгол гэсэн ялгаа байхгүй. Бидний мэргэжлийн стандарт нэг учраас эрэн хайх, аврах ажиллагаанд хүндрэл гарахгүй" гэсэн юм.  

Аврах багийн бүрэлдэхүүнд багтсан Марта, Балу хоёр нохой олны хайрыг хүртээд буй. Тухайлбал, эрэлч нохой эзнийхээ хамт утас үзэж буй хөөрхөн зураг сошиалаар цацагдсан юм. Өнөөдрийн байдлаар Марта, Балу хоёрын тусламжтайгаар дөрвөн хүнийг авраад байна. Эрэлч ноход анх удаа гадагшаа нисч, газар хөдлөлтөд нэрвэгдсэн хүмүүсийг аврах ажиллагаанд оролцож буй нь энэ аж. 

Балу гурван настай бөгөөд нэг үнэр авсан бол тасралтгүй хайж олоод хуцаж дохио өгдөг онцгой чадвартай гэнэ. Харин Марта түүнээс хоёр ах буюу таван настай. Насаар ах учир Балугаас илүү туршлагатай байж таарна. Тухайлбал, аврах үйл ажиллагаанд 2019 оноос хойш явж, Тэрэлжид алга болсон олон хүнийг олсон онцгой чадвартай аж. Иймд Балу, Марта хоёрт Турк явж байгалийн гамшигт нэрвэгсдэд туслах хариуцлагатай бөгөөд хүнд үүрэг ногджээ. 

Аврах ажиллагаа яг одоо ч үргэлжилж буй бөгөөд Манай улсын эрэн хайх, аврах багийн бүх гишүүд нурангид дарагдсан иргэдийн амийг аварч, харамсалтай ч амь үрэгдсэн иргэдийн цогцсыг олсоор байна. 

Д.Батчулуун