XVII жарны усан туулай жилийн өнгө, ноён нуруу, Төгс Буянт зурхайн ёсны талаар Хамба лам З.Санждорж мэдээлэл өгч байна. 

Тэрбээр "Үзэсгэлэн болгогч туулай жил морилон ирж байна. Ерөнхий төлөв нь уламжлалт зурхайд ард түмэн өлсөх цангах зовлонгүй өег затгалан, элдэв халдварт өвчингүй бие махбодь зовлон алжаалгүй, сэтгэл амар амгалан сайхан жил болно. Төр засгийн эрх баригчид хууль цаазаа ёсчлан сахиж чадваас түмэн олон ард иргэд аз жаргалтай, баяр цэнгэл наадмаар бялхаж, дуу хуур, хөгжим, эгшигч аялгуу цуурайтсан дэлгэр сайхан жил гарна хэмээн айлдсан байна. 

Үзэсгэлэн болгогч усан туулай жилийн хаврын урь хоёрдугаар сарын 4-ны өдөр орсон. Одоо хавар болоод эхэлж байна. Энэ өдөр тэнгэр ямар ч торойх үүлгүй, тунгалаг байсан. Цэлмэг, тогтуун сайхан байсан. Тэр өдрөөр жилийн цаг уурыг хэмждэг уламжлал бий. Ямар нэг салхи шуурга байгаагүй. Хур тундас цагтаа бууна. Зун нийт нутгаар дэлгэр сайхан байна. Намар үр тарианы ургац ариун, өвөл цас багатай, өнтэй жил болно.

Өндөр настай хүмүүст ээлтэй, зөөлөн жил болно. Идэр залуучуудад ердийн, дунд зэргийн жил болно. Хүүхэд багачуудад хатуу жил болно. Нийгмийн амьдралд зөрчил маргаан ихтэй байна. Улс төр хурцадмал, сөрөг хүчний үйл ажиллагаа эрчимжинэ. 

Усан туулай жилд урд өмнө нь болж байсан түүхэн үйл явдлууд давтагдах шинжтэй. Тухайлбал, бурханы шашны шинэчлэл, томоохон түүхэн үйл явдал болно. Дэлхийд алдартай зочин гийчин ирж, аялал жуулчлалын үйл ажиллагаанд амжилт гарна. Хууль бус үйл ажиллагаа ил болж, томоохон хэргүүд эцэслэн шийдвэрлэгдэнэ. 

Шинэ жил гарч буйтай холбоотой сөрөг тал бий. Тухайлбал, Туулай жилтэнгүүдийн сөрөг жил нь тахиа жил байгаа. Тахиө жилтнүүдэд сөрөг жил байх юм. Дөрвөн ногоон мэнгэтнүүд маш болгоомжтой байх хэрэгтэй. Нялх хүүхдүүдэд хайр халамжтай байгаарай. Усан туулай жилд буян үйлдэх ёстой" гэв.

Д.Батчулуун