Өчигдөр Монгол, Хятад улсын хилийн гэрээний зарим заалт зохицуулалтаар Овоотын отрядын 5 болон 6-р заставуудын хамгаалдаг хэсэг зурвас газраас нийт 15 км.кв хавтгай дөрвөлжин газрыг БНХАУ-д шилжүүлэх гэж байна хэмээх мэдээлэл олон нийтийн сүлжээгээр цацагдсан. Тэгвэл энэ талаар Хил хамгаалах ерөнхий газрын дарга, Хилийн цэргийн командлагч, бригадын генерал Х.Лхагвасүрэн өнөөдөр мэдээлэл өглөө.

Тэрбээр, “Хилийг 20 жил тутамд нэг удаа шалгадаг. 1982-1984 онд анх шалгаж, 2002-2004 онд хоёр дахь удаагаа шалгасан.

Улсын хилийн шугам нь газар зүйн байрлал, газрын гадаргын хөдөлгөөн, үер уснаас шалгаалж 20 жилийн хугацаанд бага хэмжээний гажилт үүсэж, хөдөлсөн байх магадлалтай. Үүнийг 20 жил тутамд шалгадаг.

Хамгийн сүүлд 2002-2004 онд хийсэн шалгалтад сүүлийн үеийн GPS-ээр тодорхойлоход 3-5 см гажсан байх магадлалтай гэж гарсан. Гурав дахь хэмжилтийг 2024-2026 онд хийнэ. Улсын хилийн шугам бол олон улсын гэрээ, эрх зүйн актаар баталгаажиж, НҮБ-д бүртгүүлсэн учир ямар ч хөдөлбөргүй гэсэн үг.

Цахим ертөнцөд тархаад буй энэ мэдээнд хилчид их харамсаж байна. Хилчид улсынхаа хилийн шугаманд өөрчлөлт гаргахгүй байхын төлөө, зөрчил гаргахгүйн тулд ажиллаж байгаа. Хоног тутамд 4-5 мянган залуу хил дээр үүрэг гүйцэтгэдэг. Гэтэл энэ мэдээн дээр Монгол Улсын Ерөнхийлөгчийг газар нутгаа бусдад зарсан, манай улсын газар нутаг дээр Хятадын анги салбар байршсан мэтээр бичжээ. Үүнийг бичсэн хүнийг манай улсын иргэн мөн үү гэдэгт би эргэлзэж байна. Наад захын эрх зүйн мэдлэггүйгээр Монгол Улсын төрийн тэргүүнийг болон мянга мянган хилчдийг үгүйсгэн ийм мэдэгдэл хийж байгаад нь их харамсаж байна. Өнөөдөр би ТЕГ, ЦЕГ-ын дарга нарт хандаж энэ хүмүүсийг олж, дайсагнан бутаргах үйл ажиллагаа явуулж буй шалтгааныг тодорхойлохыг хүссэн.

Цаашид Монгол Улсын иргэд ийм мэдээлэлд автахгүй байхыг хүсэж байна. Манай улс урд хөрш болох БНХАУ-тай 4709.6 км хэсгээр хиллэдэг. Энэ өнөөдөр бүрэн бүтэн байгаа” гэв.

Хүсэлтийн дагуу ТЕГ болон ЦЕГ-аас энэхүү мэдээллийг гаргаж нийтэлсэн хүнийг олж илрүүлэн байцааж байгаа аж.

Б.Хишиг