Өнгөрсөн хоёр өдөр нийслэл хот, орон нутгаар цас ихээр орсны улмаас халтиргаа гулгаа үүсэж байна. Энэ үеэр авто осол гарах эрсдэл нэмэгддэг учир та бүхэн аюулгүй жолоодлого хийх ТАВАН алтан дүрмийг хүргэж байна. 

1. Үнэхээр машин жолоодох шаардлага байгаа эсэхийг эргэцүүлж шийдээрэй

Энэ шийдвэр нь энгийн боловч хэдхэн цагийн дараа таныг отож буй болзошгүй аюулаас сэргийлж чадах зөв арга зам байх болно. Ялангуяа зам халтиргаа, гулгаа ихтэй байгаа үед хэдий ойрхон явах байсан ч заавал машин барих хэрэгтэй эсэхээ өөрөөсөө асуугаарай. Хэрвээ та машин барихдаа тийм ч сайн биш бол эдгээр өдрүүдэд гэртээ үлдээсэн нь хавьгүй дээр шийдвэр байх болно шүү.  

2. Ойрын гэрлээ асааж байгаарай 

Цас орж эхэлсэн үед ойрын гэрлээ асаах нь танд болон бусад жолоочийн үзэгдэх орчинг ихэсгэж, аюулаас холдуулна. Хэдийгээр та хөдөөгийн замд явж байгаа бол ялгаагүй ойрын гэрэл дээрээ тохируулж яваарай. Түүнчлэн гэрлээ тохиромжтой горимд нь шилжүүлэх нь чухал байдаг. Үзэгдэх орчин харагдахгүй болсон тохиолдолд л манангийн гэрлээ асаах хэрэгтэй. Учир нь манангийн гэрэл тусч байгаа хэсгийнхээ цасыг ихээр гялбуулдаг бөгөөд энэ нь ард байгаа жолоочийн анхаарлыг сарниулах, улмаар осол аваар дагуулах эрсдэлтэй.

3. Зайгаа барь

Мөстсөн зам дээр явж байгаа тохиолдол машин хоорондын зай хуурай замд мөрдөгддөг зайнаас 10 дахин хол байх хэрэгтэй байдаг гэнэ. Учир нь мөстсөн зам дээр тормок гишгэж зогсох хүртэл энгийн үеэсээ 10 дахин их хугацаа шаардлагатай болдог байна. Мөстсөн зам дээр гарч байгаа ослын талаас илүү хувь нь зохистой зай бариагүйгээс болдог. Иймд зайгаа барьж хэвшээрэй. 

4. Анхаарал, болгоомжтой бай

Хуурай зам дээр жолоодхоос хэд дахин илүү чадвар, мэдрэмж мөстсөн зам дээр жолоо барьж байх үед шаардагдана. Та огцом тормозлох, хурдаа нэмэх, үрүүлээ мушгих зэрэг хурдтай үйлдэл хийх л юм бол машины тэнцвэрт байдал алдагдаж, гулгаж эхлэх ба энэ нь замын хашлага, урдах машинаа ч мөргөх аюултай. 

5. Гулгахаас сэргийл

Хальтаргаанаас сэргийлэхийн тулд хамгийн эхэнд анхаарах зүйл бол машин дотроо хөгжим сонсохгүй байх явдал юм. Учир нь машин тэнцвэрээ алдан халтирч эхлэхэд хүний тэнцвэрийг зохицуулдаг эрхтэн болох чих чөлөөтэй байх нь чухал байдаг. Нөгөөтэйгүүр машины дугуй мөсөн дээгүүр явахад чихарах дуу гаргадаг бөгөөд та осолтой замаар явж байгаагаа мэдэх тусам, тэр хэмжээгээр түргэн арга хэмжээ авч чадна. Харин таны машин гулгаад эхэлчихвэл жолоо мушгих, хурдаа нэмэх тэр ч байтугай тормозоо гишгэж хэрхэвч болохгүй. Гулгаж эхэлсэн машины өөрөө зогсох хүртэл хүлээх нь хамгийн зөв шийдвэр юм. Хэрвээ таны машинд гулгах бус эргэх аюул тохиолдвол үрүүлээ эргэж байгаа зүг рүү нь мушгих хэрэгтэй байдаг гэнэ.