ОХУ-ын Ерөнхийлөгч Владимир Путин Калининград мужид халдлага үйлдвэл Москва өөрийн арсеналд байгаа бүх төрлийн зэвсгийг ашиглах асуудлыг нэн даруй авч үзнэ гэж мэдэгдэж, барууны орнуудыг Украины дайны талаарх сөргөлдөөнийг цаашид хурцатгахгүй байхыг анхаарууллаа.

Тэрбээр аравдугаар сарын 1-нд Москвад болсон Валдай олон улсын хэлэлцүүлгийн клубийн уулзалтад оролцох үеэрээ энэ байр суурийг илэрхийлсэн байна. Путин ОХУ Европын аль нэг улсыг довтлох төлөвлөгөөгүй хэмээн мэдэгдсэн ч өөрийн нутаг дэвсгэрт халдлага гарвал хариу арга хэмжээ авах бөгөөд шаардлагатай тохиолдолд цөмийн зэвсэг ашиглах боломжийг үгүйсгэсэнгүй.

Калининград нь ОХУ-ын эх газраас тусгаарлагдсан, Балтын тэнгисийн эрэгт орших нутаг дэвсгэр юм. Тус бүс нутаг нь НАТО-гийн гишүүн Польш, Литвийн хооронд байрладаг бөгөөд ОХУ-ын стратегийн чухал, өндөр цэрэгжсэн бүсэд тооцогддог.

Путины мэдэгдэл нь Балтын тэнгис орчимд НАТО-гийн орнууд цэргийн сургуулилалт зохион байгуулж, Москвагаас Калининградыг агаараар болон далайгаар тусгаарлах оролдлого хийж болзошгүй гэх анхааруулга гаргасны дараа гарчээ. ОХУ-ын тал ийм үйлдлийг хурцадмал байдлыг нэмэгдүүлсэн алхам гэж үзэж байгаа бол НАТО тус эвсэл нь хамгаалалтын шинжтэй бөгөөд Калининградыг онилоогүй гэж мэдэгдсэн байна.

НАТО мөн ОХУ-ын цөмийн зэвсэг ашиглах тухай анхааруулгыг шүүмжилж, тус эвсэл Калининградыг заналхийлээгүй, цэргийн сургуулилалт нь хамгаалалтын зорилготой гэж мэдэгджээ. НАТО-гийн Ерөнхий нарийн бичгийн дарга Марк Рютте Москвагийн цөмийн зэвсгийн талаарх мэдэгдлийг хурцадмал байдлыг бууруулахад тус болохгүй гэж үзсэн байна.

Путин мөн дэлхий нийт “аюултай үе”-ийг туулж байна хэмээн тодорхойлж, ОХУ болон НАТО-гийн хооронд шууд мөргөлдөөн үүсэхээс сэргийлэх шаардлагатайг онцолсон байна. Түүний хэлснээр Орос улс НАТО-гийн хүчнээс хэмжээний хувьд бага боловч өөрийн зэвсгийн давуу талд найдах боломжтой аж.

Л.Баяр