2026 оны Нобелийн энх тайвны шагналын эзнийг зарлах өдөр ойртохын хэрээр энэ жилийн нэр дэвшигчдийн талаарх олон улсын анхаарал нэмэгдэж байна. Норвегийн Нобелийн хороо шагналын эздийг ирэх 10 дугаар сарын 9-нд Осло хотноо зарлана.

Энэ жил уг шагналд нийт 287 нэр дэвшигч бүртгэгдсэн бөгөөд тэдний 208 нь хувь хүн, 79 нь байгууллага байна. Гэхдээ Норвегийн Нобелийн хороо нэр дэвшигчдийн албан ёсны жагсаалт болон богино жагсаалтыг олон нийтэд зарладаггүй. Нэр дэвшүүлэлт болон хорооны хэлэлцүүлгийн баримтуудыг 50 жилийн турш нууцалдаг байна.

Шагналын эзнийг тодруулахын өмнөхөн АНУ-ын Ерөнхийлөгч Дональд Трампын нэр олон улсын хэвлэл мэдээллийн анхаарлын төвд байна. Трамп өмнө нь Нобелийн энх тайвны шагнал хүртэх хүсэлтэйгээ олон удаа илэрхийлж байсан бөгөөд түүнийг энэ жилийн нэр дэвшигчдийн нэг байж болзошгүй гэж мэдээлж байсан. Гэхдээ Нобелийн хороо нэр дэвшигчдийн нэрийг албан ёсоор баталгаажуулдаггүй.

Reuters агентлагийн мэдээлснээр, өнгөрсөн жилийн шагналын дараах үйл явдал энэ жилийн хорооны шийдвэрт анхаарал татах хүчин зүйл болж байна. 2025 оны Нобелийн энх тайвны шагналыг Венесуэлийн сөрөг хүчний удирдагч Мария Корина Мачадо хүртсэн бөгөөд тэрээр дараа нь медалиа Трампад гардуулсан. Харин Норвегийн Нобелийн хороо Нобелийн шагналыг өөр хүнд шилжүүлэх, хуваалцах боломжгүй гэж тодорхой мэдэгдсэн.

Энэ жилийн шагналын талаар олон улсын судлаачид, шинжээчдийн дунд хэд хэдэн нэр, байгууллага яригдаж байна. Ослогийн Энх тайвны судалгааны хүрээлэнгийн захирал Хаакон Гьерлёвын есдүгээр сарын 22-нд шинэчилсэн жагсаалтад Save the Children, Суданы Emergency Response Rooms, Сэтгүүлчдийг хамгаалах хороо, Олон улсын шүүх, Олон улсын эрүүгийн шүүх, Олон улсын сансрын станц зэрэг нэр багтжээ. Энэ нь Нобелийн хорооны албан ёсны нэр дэвшигчдийн жагсаалт биш юм. Нобелийн энх тайвны шагналын эзнийг 10 дугаар сарын 9-ний 11:00 цагт Ослогийн Норвегийн Нобелийн хүрээлэнд зарлана. Шагнал гардуулах ёслол 12 дугаар сарын 10-нд болох юм.