
Мексикийн хар тамхины наймааны түүхэн дэх хамгийн нөлөө бүхий гэмт хэргийн бүлэглэлийн нэг болох Гуадалахарагийн картелийг үүсгэн байгуулагч Мигель Анхель Феликс Гальярдо 80 насандаа эмнэлэгт нас баржээ. Түүнийг “Боссуудын босс” болон “Загалмайлсан эцэг” хэмээн хочилдог байв. Жалиско мужийн Аюулгүй байдлын байгууллагын мэдээлснээр, Феликс Гальярдо арваннэгдүгээр сарын 13-нд Пуэнте-Гранде шоронгоос Гуадалахара хотын хувийн эмнэлэгт яаралтай хүргэгдсэн байна. Тэрээр биеийн байдал нь муудаж, амьсгалахад хүндрэлтэй болсон тул эмнэлэгт хүргэгдсэн бөгөөд арваннэгдүгээр сарын 15-ны өдөр олон эрхтний дутагдлын улмаас нас баржээ.
Тэрээр 1970-аад онд Мексикийн хар тамхины наймааны гол тоглогчдын нэг болж, тус улсын орчин үеийн хар тамхины сүлжээг бий болгоход чухал үүрэг гүйцэтгэсэн юм. Өмнө нь цагдаагийн алба хаагч, мужийн захирагчийн бие хамгаалагчаар ажиллаж байсан тэрээр Рафаэль Каро Кинтеро, Эрнесто Фонсека Каррильо нарын хамт Гуадалахарагийн картелийг байгуулжээ.
Тус картел нь 1970–1980-аад онд Мексикээр дамжуулан АНУ руу их хэмжээний кокаин тээвэрлэдэг байв. Феликс Гальярдо Колумбын хар тамхины бүлэглэлүүд, тэр дундаа Пабло Эскобарын тэргүүлдэг Медельиний картелтэй холбоо тогтоож, хар тамхины нийлүүлэлтийн сүлжээг өргөжүүлжээ. Ингэснээр Колумбод үйлдвэрлэсэн хар тамхийг Мексикээр дамжуулан АНУ-д хүргэх томоохон сүлжээ бий болсон байна.
Түүнийг 1989 онд баривчилж, хар тамхины наймаа болон зэвсэгтэй холбоотой хэрэгт 40 жилийн хорих ял оноожээ. Үүний дараа 1985 онд АНУ-ын Хар тамхитай тэмцэх газрын (DEA) ажилтан Энрике “Кики” Камарена болон Мексикийн нисгэгч Альфредо Завала Авелар нарыг хулгайлж, хөнөөсөн хэрэгт холбогдуулан дахин шүүсэн байна. 2017 онд шүүх түүнийг уг хэрэгт буруутай гэж үзэж, нэмж 37 жилийн ял оноосон ч Феликс Гальярдо өөрийн оролцоог үгүйсгэсээр иржээ.
Түүний баривчилгааны дараа Гуадалахарагийн картел хэд хэдэн бүлэглэлд хуваагдсан бөгөөд тэдгээрийн дундаас Синалоа болон Хуаресийн картел зэрэг гэмт хэргийн байгууллагууд бий болсон гэж үздэг. Феликс Гальярдо амьдралынхаа сүүлийн жилүүдэд эрүүл мэндийн хувьд хүнд байдалтай байжээ. Тэрээр нэг нүдний хараагаа алдсан, бараг сонсголгүй болсон бөгөөд бие даан алхах боломжгүй байсан аж. Түүний амьдрал, гэмт хэргийн замналыг өгүүлсэн түүхийг Netflix-ийн “Narcos: Mexico” цувралд дүрсэлсэн байдаг.
Л.Баяр

























































