
АНУ-ын Ерөнхийлөгч Дональд Трамп ирэх долоо хоногт БНХАУ-ын дарга Ши Жиньпин, ОХУ-ын Ерөнхийлөгч Владимир Путин нартай хамтарсан уулзалт хийхээр болжээ. Энэ нь АНУ, ОХУ, БНХАУ-ын удирдагчид гурвуулаа нэг дор уулзах анхны тохиолдол болох юм. Цагаан ордны мэдээлснээр, уг уулзалт арваннэгдүгээр сарын 19-нд БНХАУ-ын Шэньжэнь хотод болох Ази, Номхон далайн эдийн засгийн хамтын ажиллагааны байгууллага (АПЕК)-ын дээд хэмжээний уулзалтын үеэр зохион байгуулагдана.
Уулзалтаар дэлхийн цөмийн зэвсгийн нөөцийг бууруулах асуудлыг голлон хэлэлцэхээр төлөвлөжээ. Цагаан ордны хэвлэлийн төлөөлөгч Оливия Уэйлсийн хэлснээр, Ерөнхийлөгч Трамп цөмийн зэвсэг дэлгэрэх нь маш аюултай гэж үзэж байгаа бөгөөд энэ чиглэлээр шинэ хэлэлцээр байгуулах боломжийг эрэлхийлэх аж.
Гэхдээ АНУ-ын өндөр албан тушаалтан уулзалтаар тодорхой тохиролцоонд хүрнэ гэж хүлээхгүй байгаагаа мэдэгдсэн байна. Тэрбээр үүнийг гурван улсын удирдагчдын түвшинд цөмийн зэвсгийн асуудлаар яриа хэлэлцээ эхлүүлэх эхний алхам гэж тодорхойлжээ.

АНУ, ОХУ-ын хооронд байгуулсан цөмийн зэвсэг хязгаарлах хамгийн сүүлийн гэрээ болох “New START” энэ оны хоёрдугаар сард дуусгавар болсон. Харин БНХАУ цөмийн зэвсгийн нөөцөө эрчимтэй нэмэгдүүлж байгаа ч Вашингтон, Москвагийн зүгээс тавьж буй хязгаарлалтын хэлэлцээнд нэгдэх сонирхол бага байгаагаа илэрхийлсээр ирсэн.
Мөн гурван улсын удирдагч Ираны асуудлыг хэлэлцэхээр төлөвлөж байгаа аж. Харин ОХУ-ын Украинд явуулж буй дайны асуудлыг энэ удаагийн гурван талт уулзалтаар хөндөхгүй гэж АНУ-ын албаныхан мэдэгджээ. Вашингтон уг асуудлаар Москва, Киевтэй тусдаа дипломат шугамаар хэлэлцээ хийж байгаа юм.
Трамп БНХАУ-д хийх айлчлалынхаа үеэр Ши Жиньпинтэй хоёр талын уулзалт хийхээр төлөвлөсөн бөгөөд Путинтэй тусад нь ганцаарчилсан уулзалт хийх хөтөлбөр байхгүй байна. Түүнчлэн тэрбумтан Илон Маск Трампын Хятад дахь айлчлалын зарим хэсэгт хамт явах боловч гурван талт уулзалтад оролцохгүй гэж Цагаан ордноос мэдээлжээ.
Л.Баяр


























































