
Израилын арми 2023 оны аравдугаар сарын 7-нд Израил руу хийсэн халдлагыг төлөвлөх, зохион байгуулахад оролцсон ХАМАС бүлгийн ахлах командлагчийг агаараас цохилт өгч устгасан байна. Түүний өмнөх командлагч мөн Израилын цохилтод өртөж амиа алдсанаас хойш ердөө хоёр сарын дараа энэ хэрэг гарчээ.
Израилын Батлан хамгаалах арми (IDF) болон ХАМАС бүлэг ням гарагт хийсэн мэдэгдэлдээ Рафах бригадын командлагч Самир Махмуд Абу Юнисыг Газын зурвасын өмнөд хэсэгт байрлах Хан Юнис хотын Аль-Маваси бүсэд бямба гаргийн шөнө агаараас цохилт өгөх үеэр устгасныг баталжээ.
ХАМАС-ын зэвсэгт жигүүр болох Аль-Кассамын бригадын мэдээлснээр, Абу Юнис 1991 онд тус бүлгийн зэвсэгт хүчинд нэгдсэн бөгөөд Рафах бүсэд хэд хэдэн өндөр албан тушаал хашиж байжээ. Түүнийг 2023 оны аравдугаар сарын 7-ны халдлагыг төлөвлөх, удирдан зохион байгуулахад оролцсон гол командлагчдын нэг байсан гэж ХАМАС мэдэгдсэн байна. Тэрбээр өмнөх командлагч Наэль Абу Обейдийг Израилын арми есдүгээр сарын 15-нд устгасны дараа Рафах бригадын удирдлагыг авсан аж. Харин Абу Обейдээс өмнө тус бригадыг удирдаж байсан Мухаммад Шабане 2025 оны тавдугаар сард Израилын цохилтод өртөж амиа алдсан юм.
Израилын Батлан хамгаалахын сайд Исраэль Кац “Израилын арми Газын зурвас дахь ХАМАС-ын удирдагчдыг устгасаар байна” хэмээн мэдэгдэж, Газын зурвасыг зэвсэггүй болгож, ХАМАС-ыг бүрэн устгах хүртэл цэргийн ажиллагаагаа үргэлжлүүлнэ гэжээ.
Энэхүү цохилт нь Израилын арми Хан Юнис хотын Нассер эмнэлгийн цогцолбор руу довтолсноос хэдхэн хоногийн дараа болсон байна. Израилын тал уг ажиллагаагаар ХАМАС-ын Хан Юнис бригадын командлагч Мухаммад Абу Исмаилыг онилсон гэж мэдэгдсэн ч түүнийг амиа алдсан эсэх нь одоогоор батлагдаагүй байна.
АНУ-ын Ерөнхийлөгч Дональд Трампын зуучлалаар 2025 оны аравдугаар сард гал зогсоох тохиролцоонд хүрсэн ч Газын зурваст Израилын цохилтууд үргэлжилсээр байгаа юм. Газын эрүүл мэндийн байгууллагын мэдээлснээр, гал зогсоох хэлэлцээр хэрэгжиж эхэлснээс хойш Израилын довтолгооны улмаас 1,600 гаруй палестин хүн амиа алджээ.
Л.Баяр



























































