Дэлхийн эрүүл мэндийн байгууллагын олон улсын эмийн аюулгүй байдлын хяналтын хөтөлбөрийг хэрэгжүүлэгч УППСАЛА төв нь 2016 оноос хойш иргэд, эмнэлгийн мэргэжилтний гаж нөлөөний талаарх ойлголт, мэдлэгийг сайжруулах, түүнийг мэдээлэхийн ач холбогдлыг таниулах зорилгоор “MedSafetyWeek-Эмийн аюулгүй байдлын долоо хоног” аяныг зохион байгуулж ирсэн.

Энэ жилийн арга хэмжээ 2023 оны 11 дүгээр сарын 6-12-ны өдрийн хооронд “Эмийн гаж нөлөөг хүн бүр мэдээлэх боломжтой” уриан дор үргэлжилж байна.

Дэлхийн 100 гаруй эмийн зохицуулалтын байгууллага, 90 гаруй улсыг эгнээндээ нэгтгээд байна.

Монгол Улсын Засгийн газрын тогтоолоор 2020 онд бие даасан “Эмийн үндэсний зохицуулалтын агентлаг” байгуулагдсан нь УППСАЛА төвд албан ёсны гишүүнээр нэгдэх эрх зүйн байдал бүрдэж, 2021 онд тус төвийн 149 дэх жинхэнэ гишүүн орноор элссэнээр олон улсын эмийн хяналтын хөтөлбөрийг хэрэгжүүлэгч орны нэг болсон.

Ингэснээр гаж нөлөө бүртгэн мэдээлэх тогтолцоо бүрэн цахимжсан төдийгүй  олон улстай эмийн аюулгүй байдлын дохио, мэдээллийг шуурхай солилцох боломж бүрдэн үндэсний фармаковижилансын тогтолцоонд томоохон дэвшил гараад байна.

Иймд фармаковижилансын оролцогч талуудыг өргөн цар хүрээтэй хамруулж, тэдний оролцоог идэвхжүүлж, эрх зүйн орчны хэрэгжилтийг хангах, цахим системийг хэрэглээг таниулах зорилгоор энэ жилийн MedSafetyWeek-2023 аяны хугацааг үндэсний хэмжээнд өргөтгөсөн хэлбэрээр буюу 2023 оны 11 дүгээр сарын 6-20-ны хооронд зохион байгуулахаар зарласан.

Өнөөдрийн байдлаар нийслэл, хөдөө орон нутгийн 250 гаруй оролцогч албан ёсоор аянд нэгдэхээр бүртгэлээ ирүүлж, төлөвлөгөөгөө хэрэгжүүлэн ажиллаж байна.

Тус аяны хүрээнд иргэдийн эмийн гаж нөлөөний талаарх ойлголт, мэдлэгийг сайжруулах, хэрхэн мэдээлэх, мэдээлэхийн ач холбогдлыг олон нийтийн цахим сүлжээгээр дамжуулан таниулан сурталчилахад чиглэсэн төрөл бүрийн арга хэмжээ зохион байгуулахад чиглэж байна.

Улсын хэмжээнд 2017-2023 оны хооронд нийт 722 эмийн гаж нөлөөний тохиолдол үндэсний мэдээний санд бүртгэгдсэн байна.

Мэдээлэгдсэн гаж нөлөөний тохиолдол бүрийг үнэлж, тухай бүр Эм судлалын салбар зөвлөлийн хурлаар хэлэлцүүлэн үнэлгээг баталгаажуулан, шаардлагатай тохиолдлуудад зохицуулалтын шийдвэр, зөвлөмжийг гарган эрсдэлийг бууруулах арга хэмжээг авч хэрэгжүүлэн ажилладаг.

Иймд эмийн гаж нөлөөний сэжигтэй тохиолдол бүрийг мэдээлэх нь судлагдаагүй ховор, ноцтой гаж нөлөөний тохиолдлыг илрүүлэхээс гадна хуурамч, стандартын бус, бүртгэлгүй эм болон бусад эмийн хэрэглээтэй холбоотой асуудлыг илрүүлэн шуурхай арга хэмжээ авах боломжийг бүрдүүлж байдаг.

Өнөөдрийн байдлаар манай улсад эмийн аюулгүй байдлын хяналт Эм, эмнэлгийн хэрэгслийн тухай хууль, ЭМС-ын 2023 оны А/67 дугаар тушаалаар батлагдсан “Эмийн гаж нөлөөг бүртгэх, мэдээлэх, үнэлэх, баталгаажуулах” журмаар зохицуулагдаж байна.

ДЭМБ-ын зөвлөмжөөр эмийн гаж нөлөөний тохиолдлыг илүү сайн цуглуулахын тулд аль болох олон эх үүсвэрийг ашиглахыг зөвлөдөг.

Манай улс одоогийн байдлаар дараах эх үүсвэрүүдийг ашиглан гаж нөлөөний тохиолдлыг хүлээн авч байна. Үүнд, уламжлалт хэлбэр буюу гараар маягт бөглөх цаасан хэлбэр, шууд утсаар холбогдох, комьпютер ашиглан бөглөх боломжтой FDF маягт, gajnoloo@mmra.gov.mn цахим хаяг болон иРепортинг цахим системүүд багтаж байна.

Иймд эм хэрэглэсэнтэй холбоотой илэрсэн гаж нөлөөний сэжигтэй тохиолдол бүрийг дээрх хэлбэрүүдээс өөрт тохиромжтойг сонгон бидэнд мэдээлснээр цаашид учирч болзошгүй эрдэлээс хэн нэгнийг хамгаалах боломжтой. Мэдээлэл бүр үнэ цэнэтэй.

Эмийн гаж нөлөөг мэдээлэх бол ЭНД дарна уу. 

Эх сурвалж: Эм, эмнэлгийн хэрэгслийн хяналт, зохицуулалтын газар