Цас будрахад баярладаг сэтгэлтнүүд минь та нар энэхэн хотын хаах нь талд даарч, нусаа шудран явна вэ? Улаанбаатар хотын замын түгжрэлийн сайд өнгөрсөн сард "Ногоон автобус"-ны гэх хэргээр далимдуулан түгжрэл эхлэхээс өмнө амжиж, зальжин байдлаар огцорсон. Түүний залгамжийг нэрт баян, нутагтаа очиж иргэд, дэмжигчдээ ялгаварлагч гэгдэх УИХ-ын гишүүн Борхүүгийн Дэлгэрсайхан авсан. Тэр гэхдээ юу хийгээд, хаагуур яваад байгаа юм бол?

Түгжрэлийн сайд огцрохтой зэрэгцэн зунжин шавар шавхай, үер өтөгтэй тэмцсээр шантарсан Монгол улсын аварга, хотын дарга Д.Сумъяабазар үүрэгт ажлаа өгсөн. Хачирхалтай нь тохироо гэмээр үйл явдал болсон нь саяхан л Хууль зүй, дотоод хэргийн сайд байсан Х.Нямбаатар хотын дарга болоодхов. Үнэхээр л нүдэн дээр наймаалцчихав уу гэлтэй санагдсан. Хөөрхий тэрбээр үүрэгт ажлаа аваад "хотын төвийг төлбөртэй зорчих бүс болгоно" гэж хэлээд олны хараалыг барав. 

Ямартай ч түгжрэлийн сайдыг дуг нойрондоо дугжирч хэвтэх хооронд шинэ хотын дарга Х.Нямбаатар цас хунгарласан шөнийн замаар жолоо мушгиж, нөхцөл байдалтай биеэр танилцаж, таарсан ганц нэг хүнийг загнаж яваа харагдсан. 

Өнгөрсөн даваа гарагт ажил цуглаж, иргэд орой тараад харих гэтэл зам нь ТАГ, автобус нь ПИГ дүүрэн. Гадаа хасах хэмд шилжсэн энэ цагт хөл, гарын хуруугаа хөлдөөхгүйг хичээх нь л зол болов. Иргэд хэдэн цагаар автобус, унаа хүлээнэ. Гэтэл өнөөх түгжрэлийн сайд маань таг чиг. Уг нь үүрэгт ажлаа авсан хүн үг ч болтугай хэлмээр сэн дээ.  

Манай улс өнгөрсөн оноос шинэ автобуснууд худалдаж авсан. Түүний нэг жишээ нь мэр сэр үзэгдэх болсон УЛААН автобус юм. НОГООН автобусны сураг дуулдаад, хэрэг болоод л намжив. Үүний нөлөөнд иргэд л хохирч сууна. Бид өнгөрсөн өдрүүдэд "Монгол гуравдугаар сургууль"-ийн буудлаар гэлдрэв. Ажлын цаг оройн 18:00 цагт дуусаж, иргэдийн хөл автобусны буудлуудаар ихсэв. Энэ буудлаар хамгийн их үзэгдэх нь "Ч:5 - Шар хад - 3,4 хороолол", "Ч:25 - Тоосгоны үйлдвэр - 3,4 хороолол" чиглэлийн автобуснууд л. Эндээс хүн ам олонтой Баянхошуу зүглэх нь "Ч:41 - Баруун салаа - Баянхошуу - Халдварт" чиглэлийн унаа. Сансарын ШТС, Сансарын үйлчилгээний төв уруудаад ХӨСҮТ орно. Тэгээд эргэнэ. 

"Ulaanbaatar Bus" аппликейшний хүчинд явах чиглэлийнхээ унааг хаана явааг мэдчихдэг болсон нь ХУРГАН дэвшил. Гэвч нийтийн тээврийн хүрэлцээ, хүртээмж жил ирэх тусам бахь байдгаараа байгааг юунаас нуух билээ. Замын түгжрэлийн нөхцөл байдал улам л хүндэрч байна. Ирдэггүй 41 чиглэлийн автобусыг уг буудал дээр бүтэн цаг хүлээв. Зам битүү түгжрэлтэй байсан тул хуучнаар ЗУРАГТ, одоогийнхоор МҮИС-ийн буудлыг зорив. Тэнд хүрэхэд оройн 19:30 цаг болсон байх. Буудал дээр 200-300 гаруй хүн хоёр, гурван цаг автобус хүлээж зогсоно. Яаж мэдсэн гэхээр бүгд л бачуурсан, даарсан даа нэгэнтэйгээ үг сольж, "Эрт харина гээд 17:00 цагт ажлаасаа гарсан ч одоо болтол эндээ байгаа" гэх мэтээр бухимдана. 

Саяхан MNB сувгаар "Иргэд 30-40 минут автобус хүлээж байна" гэх мэдээлэл гарав. Үгүй дээ, бид чинь хоёр гурван цаг хүлээж байгаа. Өвлийн улиралд цас ороогүй, замын түгжрэл хэвийн нөхцөлд л 30-40 минут автобус хүлээдэг гэдгийг иргэд яриад өгнө. Цас орж, түгжрэл үүссэн нөхцөлд байдал улам хурцдах нь мэдээжийн хэрэг. Тиймээс "баримттай мэдээлье". Та нар уг нь дэргэдэх буудлаасаа л сурвалжилсан байна лээ. Бидний дааран байж үзсэнтэй зөрөөд байх юм. 

МҮИС-ийн буудал дээр бараг л 30 минутад нэг автобус Баянхошуу зүглэн ирнэ. Гэвч дүүрэн хүнтэй тул энд зогсоо хэн нь ч сууж амжихгүй. Зарим нь "өнөөдөр ч харихгүй нь дээ" хэмээн наргиа хийх нь гунигтай. Гадаа дэндүү хүйтэн. Тэдний зарим нь өвлийн хувцсаа авч амжаагүй. Тэдний хүсэл угтаа ХАРИХ. Гэр бүлтэйгээ цагийг сайхан ӨНГӨРӨӨХ. 

Гэвч Түгжрэлийн сайд Б.Дэлгэрсайхан та хаана байна. Юу хийж бүтээх гэж байна вэ? 

Л.Сайнаа