Улирч буй энэ долоо хоногт дэлхийн дахинд ямар онцлох үйл явдлууд болсон тухай хүргэх гэж байна. Энэ долоо хоногт дэлхий дахинаа яг ямар үйл явдлууд дуулиантай байв. Тойм мэдээлэлтэй танилцана уу.
Хорт хавдарт "дарлуулсан" хатан хааны гэр бүл
Уэльсийн гүнж Кэтрин хорт хавдраар хими эмчилгээ хийлгэж, "эмчилгээний эхний шатанд" байгаа тухай зарласан нь Английн хатан хааны гэр бүлийн хувьд өөр нэг аймшигт мэдээ байв. Английн хаан Чарльз III түрүү булчирхайн хорт хавдартай гэдгээ зарлан хаана ширээнээсээ буух тухай зарлаад удаагүй байтал бэр нь мөн адил мэдээ дуулгав. Тэд хэдхэн сарын өмнө Лондоны нэгэн хувийн эмнэлэгт цуг эмчлүүлсэн юм.
Бямба гаргийн өглөө Их Британи даяар томоохон сонин болгоны өнгө аяс түгшүүрт гарчигаар дүүрэн байв. "Таймс" сонин л гэхэд нүүрэндээ "Гүнж хорт хавдраа илчлэв: Би зүгээр байх болно" гэсэн гарчигтайгаар олныг тайвшруулах үзэл баримтлал бүхий тэмдэглэлийг онцолжээ. "The Sun" гэх шар хэвлэл гүнжид "Кэйт, ЧИ ГАНЦААРАА БАЙХГҮЙ", "FT Weekend" харин "Кэйт таамаглалыг зогсоов" гэх гарчигийг сонгов.
Өдгөө 42 настай Кэтрин эрүүл мэндээ хэдэн долоо хоног тасралтгүй оношлуулсны эцэст хорт хавдартай тэмцэж байгаагаа олон нийтийн хэрэгслээр мэдэгдсэн юм. Хэн ч харсан түүний мэдэгдэл зоригтой алхам байв. Их Британид хавар болж, хийсэх навчсын дундах гудамжны сандал дээр суугаад өөрийн түүхийг тайвнаар хүүрнэсэн нь хэн бүхний сэтгэлийг зониход хүргэв. Түүний мэдэгдлээс чин сэтгэл, шударга байдал харагдсан.
Москвагийн халдлагын жинхэнэ хэрэгтнүүд
Москвагийн концертын танхимд болсон халдлагын дөрвөн сэжигтнийг шүүхэд шилжүүлэв. "Крокус Сити" концертын танхимд халдлага үйлдсэн дөрвөн яллагдагч тус бүрийг ням гарагт Москвагийн шүүхэд авчирч, гурав нь бүх хэрэгт буруутай гэж тус улсын төрийн мэдээллийн агентлаг ТАСС мэдээлсэн.
Яллагдагчийн талаар бид дараах зүйлийг мэдэж байна
Далержон Мирзоев: 32 настай тэрбээр шүүхэд анх ирсэн шүүгдэгч. Тажикистан улсын иргэн Мирзоев Оросын өмнөд хэсгийн Сибирийн Новосибирск хотод гурван сарын хугацаанд түр бүртгэлтэй байсан ч хугацаа нь дууссан гэж РИА Новости мэдээллээ.
Саидакрами Рачабализода: Тэр хоёр дахь яллагдагчаар оролцож, шүүхэд "ОХУ-ын бүртгэлийн бичиг баримт байгаа ч хаана байгааг нь санахгүй байна" гэж хэлсэн. Тэрбээр орчуулагчаар дамжуулан ярьсан гэж РИА Новости агентлаг мэдээлэв. Рачабализода нь 1994 онд төрсөн байна.
Шамсидин Фаридуни: 1998 онд Тажикстанд төрсөн. Мөн Тажикистан улсын иргэн. Фаридуни ОХУ-ын Подольск хотын нэгэн үйлдвэрт албан ёсоор ажиллаж байсан бөгөөд Красногорск хотод бүртгэлтэй байсан гэж тус улсын РИА Новости агентлаг мэдээлэв.
Мухаммадсобер Файзов: Дөрөв дэх шүүгдэгч тэргэнцэр дээр ямар ч хариу үйлдэл үзүүлэхгүй сууж байв. Шүүх хуралдаанд эмчийн хамт ирсэн нь Москва хотын шүүхийн "Telegram" дээр хуваалцсан видео бичлэгээс харагдаж байна. Файзов эрхэлсэн ажилгүй байсан бөгөөд өмнө нь Москвагаас зүүн хойд зүгт орших Иваново хотод үсчин хийдэг байжээ. Тус хотод бүртгэлтэй байсан гэж РИА Новости агентлаг мэдээлжээ. Тэр 2004 онд төрсөн гэнэ.
Тэднийг бүх насаар нь хорино
“Крокус Сити” концертын танхимд халдсан хэргийн дөрвөн сэжигтнийг бүгдийг нь энэ сарын 22-ныг хүртэл баривчлан саатуулсан гэж Москва хотын шүүх "Telegram"-ээр мэдээлсэн. Шүүгдэгчдийг ням гарагт тус тусад нь шүүх хуралд авчирсан бөгөөд гурав нь бүх хэрэгт буруутай гэж мэдэгдэв.
Энэ хэрэгт буруутгагдаж буй дөрвөн хүний нэр нь Далержон , Саидакрами Рачабализода, Шамсидин Фаридуни, Мухамадсобир Файзов нар юм.
Эдгээр нь хуучин ЗХУ-ын бүгд найрамдах улс байсан Тажикистанаас гаралтай бөгөөд түр болон хугацаа нь дууссан визээр ОХУ-д зорчиж байв.
Баасан гарагт болсон халдлагын улмаас 137 хүн амь үрэгдсэн юм. Энэхүү халдлага нь Орост сүүлийн 20 жилд хамгийн олон хүний аминд хүрсэн тохиолдол болоод буй.
Путин тав дахь удаагаа ОХУ-ын ерөнхийлөгчөөр сонгогдсоноос долоо хоногийн дараа уг халдлага болсон нь улс төрийн ямар нэг шалтгаан гэж үзэхэд хүргэв. Ямартай ч тэднийг шүүхээр бүх насаар хорих төлөвлөгөөтэй байгааг ОХУ-ын төв хэвлэлүүд онцоллсон.
Нэмэлтээр нэг гэр бүлийн гурван хүнийг баривчилсан
Москва хотын Басман дүүргийн шүүх Даваа гарагт Москва хотын захын концертын танхимд болсон террорист халдлагад оролцсон гэх өөр гурван хүнийг баривчлах шийдвэрийг гаргажээ.
Баривчлагдсан хүмүүс нь нэг гэр бүлийн гишүүд бөгөөд эцэг Исроил Исломов болон түүний хоёр хүү Диловар Исломов, Аминчон Исломов нар юм. Тэднийг бүлэг терроризмын хэргээр буруутгаж байгаа гэнэ. Тэднийг өмнөх дөрвөн хүний адил тавдугаар сарын 22-ныг хүртэл хорьж, гэм буруутай нь тогтоогдвол бүх насаар нь хорих ял өгч магадгүй байна.
Мөрдөн байцаах хорооны дарга Александр Бастрыкин хэлэхдээ, Исламовынхан террористуудыг амьдрах орон сууцаар хангаж, тээвэрлэх машин өгч, мөнгө шилжүүлсэн гэжээ. Мөрдөн байцаалтын дагуу ах дүү Исломовууд 2024 оны эхээр террорист бүлэглэлд татагдан орсон нь батлагдсан байна.
Исламовын гэр бүл Тажикстаны нийслэл Душанбе хотын уугуул. Исроил нь Тажикистаны иргэншилтэй, ОХУ-д оршин суух зөвшөөрөлтэй бол Диловар, Аминчон хоёр Оросын иргэн. Тэд ОХУ-д таксины жолооч хийдэг. Одоогоор Аминчон өөрийгөө уг хэрэгт холбоогүй хэмээгээд байна.
ОХУ-ын Холбооны аюулгүй байдлын алба террорист халдлагатай холбоотой 11 сэжигтнийг баривчилсан. Тэдний дөрөв нь халдлага үйлдсэн гэж өмнө нь мэдээлж байсан. Баасан гарагт Москва хотын захын "Крокус Сити Холл"-д болсон террорист халдлагад 139 хүн амиа алдаж, 182 хүн шархадсан эцсийн тооцоо гарчээ.
Эквадор: Хамгийн залуу, 27 настай хотын дарга эмэгтэй буудуулж нас барав
Эквадорын хамгийн залуу хотын дарга гэгддэг 27 настай Брижит Гарсиа ням гаргийн өглөө буудуулж нас барсан байдалтай олджээ. X дээр нийтэлсэн цагдаа нарын мэдэгдэлд, далайн эргийн жижиг хот болох Сан Висенте хотын дарга Гарсиа, харилцаа холбооны захирал Жайро Лоорын хамт түрээсийн машинд явж байжээ. Гэвч залуу эмэгтэй бууны шархнаас болж амиа алдсан урьдчилсан байдлаар тогтоогдсон гэнэ. Мөрдөн байцаалтын явцад машин дотроос буудсан гэдгийг илрүүлсэн байна.
Цаашид мөрдөн байцаалтын ажиллагаа үргэлжилж байна гэж цагдаагийн газраас мэдээллээ. Ням гарагт хийсэн мэдэгдэлдээ, Эквадорын Засгийн газрын яам уг аллагын ард хэн нэгэн хүн, бүлэглэл байсан гэж буруутгаагүй гэнэ.
Сан Висенте хотын захиргааны мэдэгдэлд, даваа гаргийн үдээс хойш Гарсиагийн дурсгалыг хүндэтгэх арга хэмжээ зохион байгуулсан. Түүнийг оршуулах ажлыг мягмар гарагт хийхээр төлөвлөжээ.
Тус улсын хувьд он гарсаар зэвсэгт бүлэглэлийн эмх замбаараагүй байдалтай хатуу тэмцэж байгаа. Мөн нэлээдгүй албан тушаалтнуудын үхэл ч бүртгэгдсэн.
Мьянмарын Хунтагийн цэргүүд хоёр залууг амьдаар нь шатаасан бичлэг цацагдав
21 настай Фо Тэй, 20 настай Тар Хтаун гэх хоёр залуу 2021 онд болсон цэргийн эргэлтийн дараа Мьянмарын баруун хойд нутаг дахь гэр бүлийн фермээ орхин орон нутгийн зэвсэгт эсэргүүцлийн бүлэглэлд нэгдэж, Зүүн өмнөд Азийн энэ улсад энх тайван, ардчилал авчрахаар сэтгэл шулууджээ.
Гэвч тэднийг өнгөрсөн оны арваннэгдүгээр сарын 07-нд цэргийнхний эсрэг тулалдааны үеэр баривчилж, ойролцоох тосгонд аваачин Мьянмарын армийн цэргүүдийн хяналтан дор Хунтаг дэмжигч бүлэглэл тарчлаан хөнөөсөн аймшигт бичлэг энэ цаг үед шуугиан тариад байна.
Тэдний үхэл аймшигтай боловч Мьянмар улсад цэргийнхэн энгийн иргэдийн эсрэг алан хядах дайн явуулж байгаатай харьцуулбал энгийн зүйл мэт болжээ.
Тэд хоёр залууг цусанд хутгалдтал нь зодож тарчлаан, хөлийг нь модтой хүлж газраар ширж буйг дүрс бичлэгээс тодхон харж болно. Улмаар залуусыг амьдаар нь галдан шатаасан байна.
Гал аажмаар дүрэлзэн асахад тэдний шаналал ч мөн ихээр нэмэгдэж, төсөөлшгүй өвдөлт, аймшгийн сүүлчийн мөчүүдийг видео бичлэгт буулгажээ. Уг бичлэгийг Хунтаг дэмжигч этгээд өөрийн гар утсаараа бичжээ.
Бичлэг үзэх линк: https://edition.cnn.com/2024/03/27/asia/myanmar-military-junta-civilian-attacks-intl-hnk-dst/index.html
Тайландад ижил хүйстнүүдийн гэрлэлтийг зөвшөөрөх хуулийн төслийг батлав
Тайландын Төлөөлөгчдийн танхим лхагва гарагт ижил хүйстнүүдийн гэрлэлтийг хуульчлахаар санал хураалт явуулснаар Зүүн өмнөд Азийн улс гэр бүлийн тэгш эрхийг баталгаажуулсан Азийн гурав дахь орон болоход нэг алхам ойртлоо.
Парламентын доод танхим уг хуулийн төслийн гурав дахь буюу эцсийн хэлэлцүүлгийг хийсний дараа 400 төлөөлөгч дэмжсэнээр батлав. Уг хуулийн төслийг 10 гишүүн л эсэргүүцсэн байна.
Тайландад гэрлэлтийн тэгш байдлын тухай олон жил дуншсан асуудал эцэст нь амжилт олж буй нь энэ. Уг хуулийн төсөлд Сенатаас зөвшөөрөл авах, батлуулах зэрэг үйл явц хэдэн сар үргэлжилж магадгүй юм.
Хэрэв энэ хууль батлагдвал Тайланд улс Зүүн Өмнөд Азидаа ижил хүйстнүүдийн гэрлэлтийг хуулиар хүлээн зөвшөөрсөн анхны улс болох юм.
Ингэснээр 2019 онд Тайвань, 2023 онд Балба улс ижил хүйстнүүдийн гэрлэлтийг хуульчилсаны дараа гэрлэлтийн тэгш байдлыг хангасан Азийн гурав дахь орон болох юм.
ХАМАС-ын барьцаанд тарчилсан үзэсгэлэнт бүсгүйн ЭМГЭНЭЛТ түүх ил болов
Амит Суссана 10 дугаар сарын 07-нд ХАМАС бүлэглэл Израиль руу халдах үеэр олзлогдож, 55 хоногийн турш бэлгийн хүчирхийлэл болон хүчирхийллийн бусад хэлбэрийг тэвчсэн тухай сэтгэл шимшрэм түүхээ олон нийтэд хэлсэн анхны хүн болж байна.
10 орчим эрэгтэй түүнийг гэрээс нь анх хулгайлсан. Тэд түүнийг зодож, Газ дахь үүрэндээ аваачин аймшигтай тамлал хүртээжээ. Суссанагийн олзонд байсан тухай түүх олон хүний зүрхийг шимшрүүлж байна. Дээрэмчид бүсгүйг эхлээд ганцааранг нь хорьж, шагайгаар гинжилжээ. Хэд хоногийн дараагаас тэд буу тулган сүрдүүлж, улмаар бэлгийн харьцаанд хүчээр орсон байна. Энэ тухай "The New York Times" сонинд бичжээ.
Өмгөөлөгч Суссана 2023 оны 10 дугаар сарын эхээр ХАМАС бүлэглэлийн халдлагын үеэр олзлогдож, Газад барьцаалагдсан хүмүүсийг Палестин хоригдлуудаар солих ажиллагааны хүрээнд суллагдсан байна.
Барьцаалагдсан хүмүүсийн гэр бүлийн нэгдлийн мэдэгдэлд "Амит Суссанагийн олзонд өнгөрүүлсэн аймшигт түүхээ олон нийтэд хэлж буй нь ХАМАС бүлэглэлийн барьцаанд дотны хүмүүс нь байгаа тэрхүү хүмүүсийн сэтгэлийг гонсойлгосон мэдээллүүдийн нэг юм. Тэр бол 170 гаруй гашуун өдрийн турш энэ амьд тамыг тэвчсэн бүх барьцааны хүмүүсийн адил баатар юм. Бид хэтэрхий оройтохоос нь өмнө эдгээр зоригтой эмэгтэйчүүд, эрчүүдийг гэртээ авчрах ёстой" гэжээ.
Суссана "Нью Йорк Таймс" сонинд өгсөн найман цагийн ярилцлагадаа түүнийг барьцаалагчдын гарт мэдэрсэн сэтгэл зүйн болон бие махбодийн тарчлал, газар доорх хонгилд тохиолдсон зовлон зүдгүүрийнхээ талаар дэлгэрэнгүй мэдээлэл өгсөн юм.
Түүнийг олзонд очсоноос хойш хэд хоногийн дараа барьцааны хүмүүсийг манаж байсан хамгаалагч түүний бэлгийн амьдралын талаар асууж эхэлсэн гэж тэр хэлэв. Улмаар тэр хамгаалагч хүүхдийн унтлагын өрөөнд түүнийг тусад нь хорьж, гинжилсэн байна. Хамгаалагч орж ирэн, орон дээр түүний хажууд суугаад хормой хотыг нь сөхөж, түүнд зүй бусаар хүрдэг байсан гэж тэр сонинд ярьжээ.
Байдал бүр хурцдаж, хамгаалагч түүний сарын тэмдгийн мөчлөгийг асууж, дуусахыг нь хүлээдэг болжээ. Сарын тэмдэг нь дуусах үед тэрбээр хугацаа хожихын тулд 10 дугаар сарын 18-ны өдрөөс эхлэн долоо хоног шахам цус алдаж байгаа мэтээр жүжиглэсэн гэнэ. Аравдугаар сарын 24-ний өдөр Мухаммед гэх хамгаалагч эр түүн рүү дайрсан гэж тэр хэлэв.
Тэр өдрийн өглөө эрт Мухаммед гинжнийх нь түгжээг тайлаад угаалгын өрөөнд түүнийг орхисон. Түүнийг хувцсаа тайлж, ваннд угаалга хийж эхэлсний дараа Мухаммед буцаж ирээд үүдээр нь гар буу барин орж иржээ.
"Тэр над руу ирж, духан дээр минь буу тулгасан" гэж Суссана дурсав. Суссанаг цохиж, биеэ ороосон алчуурыг нь хүчээр тайлж, Мухаммад илж, таалан ванны ирмэг дээр суулгаад дахин цохисон байна.
Барьцаалагдсан 19 настай охин Наама Левигийн ээж Айелет Леви Шачар охиныг нь үснээс нь барин машинаар чирж буй бичлэгийг дайралт эхлэснээс нэг хоногийн ар дээр харсан байна. Охины өмд цуснд будагдсан байлаа. Тэрхүү дүр зураглалаас үүдэн Шачар охиныг нь ХАМАС-ын дайчид хүчирхийлсэн гэх бодлыг тээх болжээ.
Түүний хэлснээр "Амитийн аймшигтай гэрчлэл бол Газад байгаа бидний хайртай хүмүүс өдөр бүр бие махбодийн, бэлгийн болон сэтгэл зүйн эрүү шүүлтийг тэвчиж байгаагийн нотолгоо юм. Өдөр бүрийн зовлон нь тэдний хувьд үүрд мөнх мэт байгаа. Амитад тохиолдсон зүйл бол барьцаанд байгаа бусад олон хүмүүсийн өдөр бүр туулдаг хар дарсан зүүд юм. Магадгүй яг энэ мөчид ч гэсэн тэд тамлуулж байгаа. Бид гуйж байна. Хэт оройтохоос өмнө охидоо болон бидний хайртай бүх хүмүүсийг яг одоо бидэн дээр авчир" гэжээ.
Энэ сарын эхээр НҮБ-аас ХАМАС-ын дайчид хүчингийн болон бүлэг хүчингийн хэрэг үйлдэгдсэн байж болзошгүй гэсэн тайлан мэдээг нийтэлж, барьцаалагдсан хүмүүсийн гашуун зовлонг анх илчилсэн. ХАМАС бүлэглэлийн албан тушаалтан Басем Наим энэ сарын эхээр CNN-д өгсөн ярилцлагадаа бэлгийн хүчирхийллийн талаарх НҮБ-ын тайланг үгүйсгэсэн юм.
Амиа золиослогч бөмбөг дэлбэлж, Хятад ажилчид олноор үхэв
Мягмар гарагт Пакистаны баруун хойд хэсэгт амиа золиослогч бөмбөг дэлбэлсний улмаас таван хятад ажилчин болон нутгтийн уугуул нэг жолооч амь үрэгдсэн гэж эрх баригчид мэдэгдэв. Энэ нь Өмнөд Азийн тус улсын арми, засгийн газар Исламабадын Бээжинтэй ойр дотно харилцааг таслан зогсоох зорилготой гэж үзэж байгаа цуврал террорист халдлагын хамгийн сүүлийнх нь болоод байна.
Цагдаагийн ахлах албан тушаалтан Мухаммед Али Гандапур хэлэхдээ, дэлбэрэлт нь нийслэлээс тус улсын хамгийн том усан цахилгаан станц болох Хайбер-Пахтунхва муж дахь Дасу далан руу явах замд болсон. Амиа золиослогч этгээд явж байсан ажилчдын цувааг машинаараа мөргөсний улмаас улмаас дэлбэрэлт болсон гэжээ.
Энэхүү дэлбэрэлт нь Хятадын стратегийн холбоотон, Хятадын удирдагч Ши Жиньпиний дэвшүүлсэн “Бүс ба Зам” дэд бүтцийн санаачилгын гол холбоос болох Пакистанд долоо хоногт тохиолдсон гурав дахь харгислал болж байгаа нь тус улс дахь Хятадын төслүүдийн аюулгүй байдлын сорилт улам бүр нэмэгдэж байгааг харуулж байна. Мягмар гарагт болсон дэлбэрэлтийн хариуцлагыг ямар ч бүлэглэл хүлээгээгүй байна.
2021 онд Америкийн цэргийг татан гаргасны дараа хөрш зэргэлдээ Афганистанд Талибанчууд засгийн эрхийг гартаа авснаас хойш Пакистан улс зэвсэгт бүлэглэл, террорист бүлэглэлийн хүчирхийллийн эсрэг тэмцсээр байна.
Пакистаны талибанчууд Мягмар гарагт болсон дэлбэрэлтэд ямар ч оролцоогүй гэдгээ мэдэгдэв.
Аварга ачааны хөлөг онгоц гүүр нураасан хэргийн ГЭМТЭН нь хэн бэ?
Балтимор дахь "Фрэнсис Скотт Кей" гүүрийг асар том ачааны хөлөг онгоц мөргөж нураасан үйл явдалд хэн буруутай эсэх тухай яриа олныг хамрав. Ямартай ч буруутай этгээд, компани олон тэрбум долларын хариуцлагын нэхэмжлэлд унах нь тодорхой байгаа. Гэвч далайн даатгалын компаниуд ихэнх зардлыг хариуцах болно.
Уг хэрэгт төрөл бүрийн өмчлөгчид, компаниуд оролцож байгаа. Тэдний ярьж буйгаар уг хэргийг Титаник живэхээс өмнөх далайн хууль тогтоомжийн дагуу шийдэх боломжтой гэнэ. Гэвч энэ нь маш төвөгтэй байх болно гэв.
Америкийн тэнгисийн андеррайтеруудын хүрээлэнгийн ерөнхийлөгч Жон Миклусын хэлснээр хохирлын нэхэмжлэл нь тэрбум ам.доллар давах магадлалтай. Шүүх ажиллагаа олон жил үргэлжилнэ" гэжээ. Харин Barclays-ийн шинжээчид гамшгийн улмаас учирсан даатгалын нөхөн төлбөрийн нийт зардал 3 тэрбум ам.долларт хүрч болзошгүй гэж тооцоолж байна.
Дали гэх нэртэй уг хөлөг онгоцыг Сингапурт төвтэй "Grace Ocean Private" компани эзэмшдэг нь тогтоогдсон. Тэд "Британниа" гэх даалтгалын компанид даатгуулжээ.
"Британиа" бол далай тэнгисийн ачаа тээврийн 90 хувийг хариуцдаг консорциум болох "P&I" клубийн олон улсын группийн дэргэдэх далайн даатгалын гишүүн клубуудын нэг юм.
National Geographic: Энэ онд зочлоход тохиромжтой түүхэн үзвэрийн 20 халуун цэгийн нэгээр Монгол улсын Чингис хааны музейг нэрлэв
Ази тив - Чингис хааны музей, Улаанбаатар, Монгол
Бүтэн нийтлэлийг ЭНД дарж уншаарай...
Л.Сайнаа
