Олон улсын хүүхдийн загварын тэмцээний тэргүүн байрыг эзлэн эх орондоо ирээд буй бяцхан мисс Victoria Danny-тай ярилцлаа. Тэрбээр Монгол Улсад зохион байгуулагддаг “Бяцхан мисс-2022” тэмцээний дэд мисс, “Бяцхан мисс-2023” тэмцээний загварлаг бяцхан миссээр тодорч байсан нэгэн юм. Түүний монгол нэрийг Д.Сэцэнгоо гэдэг. 

-Энэ өдрийн мэндийг хүргэе. Вьетнам Улсад зохион байгуулагдсан Олон улсын хүүхдийн загварын тэмцээний тэргүүн байрыг хүртээд эх орондоо ирлээ. Тус тэмцээний талаар яриагаа эхэлье. 

-Тийм ээ. Олон улсын хүүхдийн загварын тэмцээнд эх орноо төлөөлөн оролцсон. Ерөнхийдөө энэ нь миссийн тэмцээн гэсэн үг л дээ. Энэ тэмцээнд оролцох үнэхээр хөгжилтэй байсан. Энэ бол гайхалтай туршлага байсан гэж бодож байна. Энэ тэмцээн яг л гоо бүсгүйн тэмцээн шиг, тайзан дээр алхаж, ярилцлага өгч, бүх зүйл нь үнэхээр хөгжилтэй. Би авьяасын үзүүлбэр дээрээ гимнастик бүжиг бүжиглэж "Extreme Talent" шагнал авсан. Мөн "Pre-teen" буюу 10-13 насны ангилалд түрүүлсэн.

-Энэ ангилалд нийт хэдэн улсын хүүхэд өрсөлдсөн бэ? 

-Нийт 18 улсын 22 хүүхэд өрсөлдсөн. Энэ бол “Junior model international world finals – 2025” тэмцээн бөгөөд заавал авьяасаа харуулах ёстой. Би гимнастик, бүжиг хийсэн. Бусад хүүхдүүд ч бас авьяасаа үзүүлсэн, үнэхээр сонирхолтой байсан.

-Тэргүүн байр эзлээд титэм зүүх тэр мэдрэмж ямар санагдсан вэ? 

-Би титэм авахдаа үнэхээр гайхаж, догдолсон. Энэ миний дараагийн аяллын эхлэл байсан. Би өөрийн хүч хөдөлмөр, хөлс, нулимс, бэлтгэл, хөлний өвдөлт, хувцас бүгдийг нь хийсний эцэст мөрөөдлөө биелүүлсэн гэж боддог. Миний бүх хичээл зүтгэл үр дүнгээ өгсөн.

-Өмнө нь олон улсын ямар тэмцээнүүдэд оролцож байсан бэ? 

-Миний хамгийн анхны гоо бүсгүйн тэмцээн Вьетнамд болсон бөгөөд би тэр үед дэд байр эзэлсэн. Мөн би Бяцхан мисс-д оролцож 3-р байр эзэлж, дахин титэм хүртсэн. Энэ нь үнэхээр гоё байсан. Энэ хоёр жилийн өмнө болсон тэмцээн бол миний анхны тэмцээн байсан. Үүнээс хэдэн сарын дараа би Бяцхан миссийн тэмцээнд оролцсон. Би үнэхээр гоо бүсгүйн тэмцээнд орохыг хүссэн.

Одоо эцэст нь би мөрөөдлөө биелүүлсээр байна. Мөн ирээдүйд юу хүлээж байгаа бол гэдэгт үнэхээр догдолж байна. 

-Мисс гэдэг бол зөвхөн тайзан дээр алхахаас гадна маш олон ур чадвар шаарддаг шүү дээ. Мөн "Extreme Talent" шагнал хүртсэн гэлээ. Энэ ур чадваруудаа хэрхэн сурсан бэ? 

-Би Америкт төрсөн. Тэнд бага байхдаа нумтай эргэлт хийж сурсан. Энэ нь саяын болсон Олон улсын хүүхдийн загварын тэмцээнд маш хэрэг болсон гэж боддог. Одоо ч энэ зүйлдээ дуртай хэвээр байгаа. Мөн гараа ашиглахгүй хийдэг агаарын эргэлт (aerial) хийж чаддаг болсон. Би үүнийг хоёр жилийн өмнө хийсэн, харин жилийн өмнөөс илүү сайн хийж эхэлсэн. Одоо сайн хийж чаддаг болсон. 

-Хэзээ Монголд ирсэн бэ? Монголын юу нь чамд таалагдаж байна вэ? 

-Монголд хоёр жилийн өмнө ирсэн. Энд гэр бүл, төрлүүдтэйгээ уулзах, тэднийг харах үнэхээр сайхан байсан. Энд тоглоомын паркуудтай, мөн найзууд минь ч бий. Монгол хүмүүсийн эелдэг байдал надад маш их таалагддаг. 

-Монголд болж буй тэмцээн, олон улсын тэмцээнд оролцохын ялгаа, онцлогыг юу гэж хардаг вэ? 

-Интернэйшнил тэмцээн гэдэг нь өөр улс орны хүүхдүүдтэй өрсөлдөнө гэсэн үг. Харин Монголд бол зөвхөн монгол хүүхдүүд өрсөлддөг. Олон улсын тэмцээн илүү сонирхолтой, олон хүнтэй танилцаж, илүү их зүйл сурч чадна. 

-Victoria-н хувьд инстаграм идэвхтэй хөтөлдөг шүү дээ. Анх хэрхэн инстаграмаа хөтөлж эхэлсэн бэ? 

-Би Instagram дээр 832 мянган дагагчтай, хүмүүс миний видеог үздэг нь үнэхээр сонирхолтой. Эхэндээ зүгээр л ээжийнхээ инстаграм сториг үзэх гэж инстаграм нээсэн. Тэгээд бичлэгүүдээ хийж эхэлсэн, нэг мэдэхэд л миний бичлэгүүд вирус шиг түгсэн.

Би бүжгийн бичлэг, "Get ready with me", загварын бичлэг, хөгжилтэй бичлэгүүд, ам барьж дуулах гээд олон төрлийн контент хийдэг.

-Хамгийн их үлгэр жишээ авдаг хүн нь хэн бэ? 

-Ээж маань миний хамгийн том дэмжигч. Мөн аав, гэр бүл маань. Ээж минь намайг хэзээ ч албадаж шахдаггүй, "Чи хүсэхгүй бол хийх хэрэггүй" гэж хэлдэг. Ээж маань намайг гоо бүсгүйн тэмцээн, загвар болон инстаграмаа хөтлөхөд дэмждэг. Мөн миний зурагчин шиг зургийг маань авч өгдөг. 

Эхлээд ээж маань "Бяцхан мисс гээд миссийн тэмцээнд оролцмоор байна уу?" гэж асуухад, "Мэдээж, сонирхолтой сонсогдож байна" гэсэн. Тэгээд тэр надад анх алхаж сурах, загварын талаар зааж өгсөн. Би түүнд үнэхээр талархдаг.

-Одоо агентлагт харъяалагддаг уу? 

-Одоо би Дубайд Athos Academy-ийн багштай. Багш маань надад алхах, загварын талаар сургаж өгдөг. Би түүнд ч бас маш их талархдаг. Би бодохдоо өвөрмөц байдал гэдэг нь авьяас, хандлага, бусдад өгч буй энэрэл, эелдэг байдал, өөртөө итгэлтэй байдал юм. Энэ бол жинхэнэ авьяас гэж боддог. 

-Өндөр өсгийт дээр хэрхэн алхаж сурсан бэ? Хэцүү санагдаж байсан уу? 

-Эхэндээ алхахад хэцүү байсан. "Өө бурхан минь, энэ үнэхээр хэцүү юм байна" гэж бодсон л доо. Гэхдээ өдөр ирэх тусам улам сайжирсан. Одоо өндөр өсгийт дээр алхах нь надад тав тухтай болсон.

8 см өсгийт бараг л гэрийн шаахай шиг санагддаг. 

-Ирээдүйд ямар зорилго тавьсан байгаа вэ? Мөн мөрөөдлийнхөө тухай хуваалцахгүй юу? 

-Би ирээдүйд илүү олон гоо бүсгүйн тэмцээнд оролцмоор байна. Энэ бол миний хүсэл мөрөөдөл. Би "World’s Universal Beauty Pageant" эсвэл "Miss Asia" зэрэг тэмцээнд оролцож, "Face of Asia"-д өрсөлдөх болно. Би түрүүлнэ гэж найдаж байна. 

Би зүгээр л алдартай болохыг хүсдэг. Миний хамгийн эхний мөрөөдөл бол алдартай болж, influencer, жүжигчин, загвар өмсөгч эсвэл гоо бүсгүй болох. Миний хоёр дахь сонголт бол эмч болох. Учир нь бусдад туслах нь үнэхээр гоё бөгөөд энэ нь дэлхийд ч тусалж чадна гэж боддог.

Д.Батчулуун