АНУ-ын ерөнхийлөгч Дональд Трамп Венесуэлд “өргөн цар хүрээтэй агаарын цохилт” өгч, тус улсын ерөнхийлөгч Николас Мадуро болон түүний эхнэр Силия Флорес нарыг баривчилж, улсаас нь гаргасан гэж мэдэгдлээ. Тэрбээр энэхүү ажиллагааг “маш амжилттай, гайхалтай гүйцэтгэлтэй” байсан хэмээн тодорхойлсон бөгөөд агаарын цохилт нь Венесуэлийн нийслэл Каракаст болон Миранда, Ла Гуайра, Арагуа мужуудад болсон гэдгийг Венесуэлийн засгийн газар баталжээ. 

Үүний хариуд Венесуэлийн Батлан хамгаалахын сайд Владимир Падрино Лопес улс даяар бүх зэвсэгт хүчнийг нэн даруй байршуулж ард иргэдээ хамгийн ноцтой түрэмгийллийн эсрэг нэгдмэл эсэргүүцэл үзүүлэхийг уриаллаа. Засгийн газар агаарын цохилтын улмаас учирсан хохирол, амь үрэгдэгсэд болон шархадсан хүмүүсийн талаарх мэдээллийг цуглуулж байна гэжээ.

Венесуэлийн эрх баригчид АНУ-ын цэргийн түрэмгийллийг эрс буруутгаж, олон улсын хамтын нийгэмлэгийг уг дайралтыг олон улсын хуулийг ноцтой зөрчсөн үйлдэл хэмээн зэмлэхийг уриалжээ. Ерөнхийлөгч Мадуро үндэсний батлан хамгаалах бүх төлөвлөгөөг идэвхжүүлэх тушаал өгч, улс даяар онц байдал зарласан байна. Мөн Венесуэлийн дэд ерөнхийлөгч Делси Родригес ерөнхийлөгч Мадуро болон Тэргүүн хатагтай Флорес нарын байршил тодорхойгүй байгаа тул АНУ-ыг тэдний амьд байгааг нотлох баримтаар яаралтай хангахыг шаарджээ. Харин АНУ-ын талын мэдээллээр Мадурог АНУ-ын армийн тусгай анги болох Дельта Форс баривчилсан гэж мэдэгдсэн ч Венесуэлийн засгийн газар одоогоор үүнийг албан ёсоор батлаагүй байна.

Мөн энэ үйл явдлын дараа Колумбын Ерөнхийлөгч Густаво Петро НҮБ-ын Аюулгүйн Зөвлөлийн яаралтай хурал зарлахыг уриалав. 

Сүүлийн таван сарын турш АНУ Венесуэлийн эсрэг дарамтаа эрчимжүүлж, тус улсын хойд эргийн ойролцоо цэргийн хүчээ нэмэгдүүлэн, “хар тамхи зөөвөрлөж буй завь” хэмээн тодорхойлсон байнууд руу агаараас цохилт өгч байсан юм. Одоогоор Цагаан ордон болон Пентагон энэ хэрэг явдлын талаар албан ёсны дэлгэрэнгүй тайлбар өгөөгүй байгаа бөгөөд дэлхий дахин нөхцөл байдлыг түгшүүртэй ажиглаж байна.

Эх сурвалж: TheGuardian