Иран болон АНУ-ын хооронд үүсээд буй дайны хурцадмал байдалд тодорхой ахиц гарч, талууд түр хугацааны гал зогсоох тохиролцоонд хүрсэн. Гэвч энэхүү тохиролцоо нь байнгын энхийн гэрээ бус, богино хугацааны түр зохицуулалт хэвээр байгаа юм.

Сүүлийн өдрүүдэд талуудын хооронд шууд болон зуучлагч орнуудын оролцоотойгоор хэлэлцээ идэвхжиж, цэргийн ажиллагааг түр зогсоох шийдвэрт хүрэв. Гэсэн ч уг тохиролцооны нөхцөлүүдийг хоёр тал өөр өөрөөр тайлбарлаж, байр суурийн зөрүү үүссэн хэвээр байна. Энэ зуурт АНУ-ын холбоотон Изриал улс Ливанд бөмбөгдөлт хийж 200 орчим хүний аминд хүрсэн. 

Хэлэлцээний гол маргаантай асуудал нь цөмийн хөтөлбөр юм. АНУ-ын зүгээс Ираны уран баяжуулалтыг бүрэн зогсоох, пуужингийн хөтөлбөрийг хязгаарлах шаардлага тавьж байгаа бол Иран “энхийн зориулалттай цөмийн хөтөлбөр”-өө үргэлжлүүлэх байр сууриндаа бат зогсож байна. 

      Мөн гал зогсоох тохиролцооны хүрээнд стратегийн чухал бүс болох Ормузын хоолойн аюулгүй байдлыг хангах, бүс нутгийн тогтвортой байдлыг хадгалах асуудал хөндөгдөж байгаа юм.

Шинжээчдийн үзэж буйгаар, одоогийн нөхцөл байдал нь бүрэн энх тайван тогтсон бус, харин талуудын хоорондын зөрчлийг намжаах “түр амсхийлт” төдий байна. Хэрэв цаашдын хэлэлцээ тодорхой үр дүнд хүрэхгүй бол зөрчил дахин хурцдах эрсдэл өндөр хэвээр байгааг анхааруулж байна. Дайн цааш өрнөх нь дэлхийн эдийн засаг, эрчим хүчний хямралыг улам бүр өдөөх бөгөөд үүнээс болж шатахууны үнэ дэлхий дахинд огцом өсөж, хувьцааны ханш унаж буй билээ. 

Ойрын хугацаанд талуудын дараагийн хэлэлцээ, ялангуяа цөмийн асуудлаарх тохиролцоо олон улсын анхаарлын төвд байх төлөвтэй байх нь гарцаагүй байна. 

Л.Баяр