Азийн орнуудад хүмүүсийн гэрийн тэжээвэр амьтны сонголт эрс өөрчлөгдөж, нохойноос илүү муур тэжээх хандлага хурдацтай өсөж байгаа талаар олон улсын хэвлэлүүд онцолжээ.
Сүүлийн жилүүдэд Япон, Өмнөд Солонгос, Хятад, Тайланд зэрэг орнуудад муур тэжээгчдийн тоо эрчимтэй нэмэгдэж байгаа бөгөөд үүнийг хотжилт, ганцаараа амьдрах хүмүүсийн өсөлт, эдийн засгийн дарамттай холбон тайлбарлажээ.
Судлаачдын үзэж буйгаар муур нь нохойтой харьцуулахад бага зай шаарддаг, өөрөөр хэлбэл авсаархан, арчлахад харьцангуй амар, өдөр бүр салхилуулах шаардлагагүй байдаг зэрэг нь орчин үеийн хотын амьдралд илүү тохирч байгаа аж.
Хятадад хийсэн судалгаагаар эмэгтэйчүүд, залуус болон өндөр орлоготой хүмүүс муур, нохойтой холбоотой контент илүү их сонирхдог нь тогтоогджээ. Мөн хүмүүс гэрийн тэжээвэр амьтдыг зөвхөн хамгаалалт эсвэл хэрэгцээний зориулалтаар бус, сэтгэлзүйн дэмжлэг, амьдралын “хамтрагч” гэж үзэх болсон байна.
Түүнчлэн Азийн олон хотод “pet-friendly” буюу амьтанд ээлтэй кафе, зочид буудал, оффис, худалдааны төвүүд нэмэгдэж байгаа нь энэ соёлыг улам түгээж байгаа талаар NHK мэдээлжээ. Гэсэн ч “муурын хүмүүс” болон “нохойны хүмүүс” гэсэн соёлын ялгаа цахим орчинд хүчтэй хэвээр байна. Зарим хүмүүс нохойг үнэнч, нээлттэй зан чанарын бэлгэ тэмдэг гэж үздэг бол муур сонирхогчид тэднийг илүү тайван, бие даасан амьтан хэмээн тодорхойлдог аж.
Шинжээчдийн хэлж буйгаар, Азийн орнуудад төрөлт буурч, ганцаар амьдрагчдын тоо өсөж буй энэ үед гэрийн тэжээвэр амьтан хүмүүсийн амьдралын чухал хэсэг болсоор байна. Ялангуяа муур тэжээх хандлага ойрын жилүүдэд улам өсөх төлөвтэй байгаа талаар судалгаанууд дурджээ.
Л.Баяр
Эх сурвалж: CNN
Сэтгэгдэл (4)