АНУ-ын Ерөнхийлөгч Доналд Трамп даваа гарагт Вашингтон дахь "Walter Reed National Military Medical Center"-т ердийн биеийн үзлэгт орж, эмч нарын үзлэгийн дараа “бүх зүйл маш сайн, төгс байна” гэж мэдэгджээ.

Цагаан ордны мэдээлснээр, уг үзлэг нь урьдчилан төлөвлөгдсөн ерөнхий эрүүл мэндийн шалгалт байсан бөгөөд ойролцоогоор хэдэн цаг үргэлжилсэн байна. Тэрбээр үзлэгийн дараа олон нийтийн сүлжээнд “Everything checked out PERFECTLY” буюу “бүх зүйл төгс гарлаа” хэмээн бичсэн байна.

Трампын эрүүл мэнд сүүлийн жилүүдэд олон нийтийн анхаарлын төвд байсаар ирсэн. Ялангуяа түүний нас, мөн гар дээрх хөхрөлт, хөл хавагнах, арьсны тууралт зэрэг ил шинж тэмдгүүд нь шүүмжлэл дагуулдаг. Эмч нар эдгээрийг ихэнхдээ ноцтой биш, эмчилгээ шаардлагагүй нөхцөл гэж тайлбарлажээ.

Цагаан ордны эмчийн мэдээлснээр, түүний арьсны асуудлыг тосон эмээр эмчилж байгаа бөгөөд хөл хавагнах нь харьцангуй нийтлэг, хоргүй шалтгаантай гэж үзсэн байна. Мөн зарим шинжилгээгээр зүрхний нас нь бодит наснаас нь залуу гарсан гэж мэдээлжээ.

Гэсэн хэдий ч түүний нас өндөр байгаа тул биеийн болон оюуны чадварын талаар улс төрийн хүрээнд маргаан үргэлжилсээр байна. Зарим эмч, шинжээчид Д.Трампын эрүүл мэндийн мэдээллийг илүү ил тод болгох шаардлагатай гэж үзэж байгаа юм.

Л.Баяр