Лаосын төв хэсгийн агуйд олон хоног гацсан иргэдийн аврах ажиллагаа үргэлжилж байгаа бөгөөд амьд гарсан хүмүүс сураггүй үлдсэн хоёр хүнийг олоход чухал байж болох шинэ мэдээлэл өгсөн байна.

Тус улсын Хайсомбоун мужийн агуйд алт хайхаар орсон долоон иргэн өнгөрсөн тавдугаар сарын 20-нд хүчтэй аадар бороо, үерийн улмаас дотор нь гацсан талаар бид мэдээлсэн. Аврагчид эхний ээлжид таван хүнийг амжилттай гаргасан ч хоёр хүн одоо хүртэл сураггүй хэвээр байна.

Аврагдсан хүмүүс эмнэлэгт хэвтэн эмчлүүлж байхдаа агуйн доторх бүтэц, явсан замын талаар нарийн мэдээлэл өгсөн нь эрлийн ажиллагаанд шинэ найдвар төрүүлжээ. Тэдний ярьснаар тав дахь хонгилын цаана нарийн ан цав бүхий, өмнө нь шалгагдаагүй зургаа дахь тасалгаа байж болзошгүй аж. Аврагчид сураггүй хоёр хүн тэнд байх магадлалтай гэж үзэж байна.

Аврах ажиллагаанд оролцож буй Финландын туршлагатай агуйн шумбагч Микко Пааси “Бидний шалгаагүй үлдсэн цорын ганц хэсэг энэ. Хэрэв тэр нарийн завсрыг нэвтэрч чадвал зургаа дахь тасалгаанд хүрэх боломжтой” гэж мэдэгджээ. Тэрбээр 2018 оны Тайландын алдарт агуйн аврах ажиллагаанд мөн оролцож байсан нэгэн юм.

Гэвч цаг агаар аврагчдад томоохон сорилт болж байна. Үргэлжилсэн борооны улмаас агуйн ус дахин нэмэгдэж, ус шавхах насосны нэг эвдэрсэн нь ажиллагааг удаашруулжээ. Ус хоёр дахь тасалгааг хүртэл дүүрсэн бөгөөд зарим хэсэгт үзэгдэх орчин маш муу байгаа аж. Аврагдсан таван хүн долоо хоногоос илүү хугацаанд харанхуй, хүндрэлтэй орчинд амьдарсан тэдэнд хоол, ус, дулаацуулах хэрэгсэл хүргэж байжээ. Олон улсын аврах багт Тайланд, Финланд, Австрали, Япон, Франц болон бусад орны мэргэжилтнүүд ажиллаж байна.

Л.Баяр