Мьянмарын зүүн хойд хэсэгт орших Шань мужид болсон хүчтэй дэлбэрэлтийн улмаас дор хаяж 55 хүн амиа алдаж, олон арван хүн шархадсан талаар орон нутгийн хэвлэлүүд мэдээллээ.

Дэлбэрэлт тавдугаар сарын 31-нд Хятадын хилтэй ойролцоох Намхкам суурингийн Каунг Тат тосгонд болсон байна. Тус бүс нутаг нь зэвсэгт бүлэглэл болох Ta’ang National Liberation Army (TNLA)-ийн хяналтад байдаг аж. Урьдчилсан мэдээллээр, уул уурхайн зориулалтаар хадгалж байсан тэсрэх бодис бүхий агуулах санамсаргүйгээр дэлбэрсэн байж болзошгүй гэж үзэж байна.

Орон нутгийн эх сурвалжуудын мэдээлснээр, амь үрэгдэгсдийн дунд 25 эмэгтэй, 30 эрэгтэй байсан бөгөөд хүүхдүүд ч өртсөн байж болзошгүй талаар дурджээ. 70 гаруй хүн гэмтэж эмнэлэгт хүргэгдсэн бөгөөд аврагчид нурангид дарагдсан хүмүүсийг эрэн хайх ажиллагааг үргэлжлүүлж байна.

Дэлбэрэлтийн хүч ойролцоох олон арван байшинг сүйтгэж, өтгөн хар утаа хэдэн километрийн зайнаас харагдсан байна. Орон нутгийн эмнэлгүүд цусны нөөц хүрэлцэхгүй байдалд орсон тухай мэдээлжээ. TNLA мэдэгдэл гаргаж, амиа алдсан болон бэртэж гэмтсэн иргэдийн гэр бүлд эмгэнэл илэрхийлээд, дэлбэрэлтийн шалтгааныг тогтоох бүрэн хэмжээний мөрдөн шалгалт эхлүүлснээ мэдэгдсэн байна. Мөн хохирогчдод эмнэлгийн болон нөхөн сэргээх тусламж үзүүлэхээ амлажээ.

Мьянмар улс 2021 оны цэргийн эргэлтээс хойш тогтворгүй байдал, зэвсэгт мөргөлдөөнтэй хэвээр байгаа бөгөөд уул уурхай болон тэсрэх бодистой холбоотой осол тус улсын зарим бүс нутагт байнга тохиолддог асуудлын нэг хэвээр байна.

Л.Баяр