Өнгөрсөн лхагва гарагт дэлхийн олон сая хүн ховор тохиох нарны бүтэн хиртэлтийг ажигласан. Тэгвэл дараагийн нарны бүтэн хиртэлт ердөө нэг жилийн дараа буюу "2027 оны наймдугаар сарын 2-нд" болно. 2027 оны хиртэлтийн бүтэн үе нь Испанийн өмнөд хэсэг, Марокко, Алжир, Тунис, Ливи, Египет, Саудын Араб, Йемен зэрэг нутгаар бүтэн үзэгдэх ажээ. Харин Европ, Африк, Ойрх Дорнод болон Азийн зарим хэсэгт нар хэсэгчлэн хиртэх байдлаар харагдана.
Энэ удаагийн хиртэлт онцгой анхаарал татаж буй гол шалтгаан нь бүтэн хиртэлтийн үргэлжлэх хугацаа байлаа. Хамгийн таатай байрлалаас ажиглавал сар нарны дискийг бүрэн халхлах үе зургаан минут гаруй хугацаанд үргэлжлэх юм байна. Энэ нь сүүлийн хэдэн арван жилийн хамгийн урт үргэлжлэх нарны бүтэн хиртэлтүүдийн нэг болно гэж НАСА-гийн мэдэгдэлд дурджээ.
Ялангуяа "Египетийн Луксор" орчим хиртэлтийг ажиглахад тохиромжтой газруудын нэгээр нэрлэгдэж байна. Тус бүс нутагт тэнгэр цэлмэг байх магадлал өндөр, эртний Египетийн дурсгалт газруудын дэргэдээс ховор үзэгдлийг харах боломжтой учраас жуулчдын сонирхлыг ихээр татаж эхэлжээ.
Нарны бүтэн хиртэлтийн үед сар нарны гэрэлт гадаргууг бүрэн халхалж, нарны гаднах "корона буюу титэм" тод харагддаг. Энэ богино хугацаанд эрдэмтэд нарны гаднах агаар мандлыг судлах онцгой боломжтой болдог.
Ирэх онд болох нарны хиртэлтийг үзэхийг хүсвэл та аяллаа эрт төлөвлөх шаардлагатай. Хиртэлтийн зурвас харьцангуй нарийн байдаг тул зөвхөн тэр бүсэд байгаа хүмүүс бүтэн хиртэлтийг харах боломжтой. Харин бусад газраас хэсэгчилсэн хиртэлт ажиглагдана.
Ирээдүйн нарны хиртэлтүүдийг харахын тулд таны очиход зүйтэй газрууд:
- 2028 оны долдугаар сарын 22: Австрали ба Шинэ Зеланд
- 2030 оны 11 дүгээр сарын 25: Намиби, Ботсвана, Өмнөд Африк, Лесото, Австрали
- 2034 оны гуравдугаар сарын 20: Нигери, Камерун, Чад, Судан, Египет, Саудын Араб, Иран, Афганистан, Пакистан, Энэтхэг, Хятад
- 2035 оны есдүгээр сарын 2: Хятад, Хойд болон Өмнөд Солонгос, Япон
- 2037 оны долдугаар сарын 13: Австрали ба Шинэ Зеланд
Анхааруулахад, нарны хиртэлтийн үед нар руу энгийн нүдээр шууд харах нь нүдийг гэмтээх аюулта байна. Тиймээс тусгай зориулалтын нарны ажиглалтын шил зүүх шаардлагатай шүү.
Л.Баяр
