“Шүүхийн шийдвэр гүйцэтгэх байгууллагын удирдлагууд хоригдлуудаар үнэ төлбөргүй хувийн хаусаа бариулж байна” гэх мэдээлэл олон нийтийн цахим орчинд нийтлэгдсэнтэй холбогдуулан Шүүхийн шийдвэр гүйцэтгэх байгууллагаас тайлбар гаргалаа.

Тус байгууллагаас дээрх мэдээлэл нь үндэслэлгүй болохыг мэдэгдэв.

Монгол Улсын Засгийн газрын 2024-2028 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд хоригдлын цалинтай ажлын байрыг 30 хувьд хүргэхээр тусгасан. Үүний хүрээнд Шүүхийн шийдвэр гүйцэтгэх байгууллага хоригдлуудыг цалинтай ажлын байраар хангах, ажлын байрны тоог нэмэгдүүлэх чиглэлээр шат дараатай арга хэмжээ авч байгаа аж.

Хоригдлуудыг хөдөлмөр эрхлүүлэхдээ цалин хөлс олгож, хөдөлмөрийн үр дүнд шагналын хоног эдлүүлэхээс гадна бусдад учруулсан гэм хорын хохирол, төлбөрийг барагдуулах боломж бүрдүүлэн ажиллаж байгаа талаар мэдээллээ.

Түүнчлэн Шүүхийн шийдвэр гүйцэтгэх тухай хуулийн 214.6, 217.1 дэх хэсэгт заасны дагуу нээлттэй хорих ангийн хоригдлыг тодорхой нөхцөл, хяналтын дор өөрийн болон бусад хуулийн этгээдэд гэрээний үндсэн дээр хөдөлмөрлүүлэх боломжтой. Энэ тохиолдолд хоригдлыг хөдөлмөрийн хөлсний доод хэмжээнээс багагүй цалин хөлстэй ажиллуулах зохицуулалт үйлчилдэг байна.

Хорих анги, байгууллагын өдөр тутмын үйл ажиллагаанд Прокурорын байгууллага болон Хүний эрхийн Үндэсний Комисс хяналт тавьдаг бөгөөд хорих байгууллагын удирдлага, алба хаагчид хоригдлыг зөвшөөрөлгүйгээр гадна хэсэгт болон цалин хөлсгүйгээр хөдөлмөр эрхлүүлэх боломжгүй гэж ШШГБ-аас тайлбарлав.

Харин цахим орчинд тархсан дээрх мэдээлэлтэй холбогдуулан Прокурорын байгууллагаас шалгалтын ажиллагаа явуулж байгаа аж.

Эх сурвалж: Шүүхийн шийдвэр гүйцэтгэх байгууллага

Т.Золзаяа