Оны шилдэг уран бүтээлч шалгаруулах “Мөнгөн мод” ёслолын арга хэмжээ болж өнгөрлөө. Энэ жил уламжлал ёсоор тайз, дэлгэцийн найруулагч, зураач, жүжигчин, дуучин, хөгжимчин, бүжигчин, утга соёлын өвийг өвлөн эзэмшигч гэсэн долоон төрлөөр шалгарууллаа. Мөн шилдгээр шалгарсан уран бүтээлчдэд тус бүр 3.0 сая төгрөгийн шагналыг олгосон юм.

2012 оны тайз, дэлгэцийн шилдэг найруулагчаар “Бурхан өршөө” киноны найруулагч Монголын кино урлагийн зөвлөлийн гишүүн, кино найруулагч З.Батболд, шилдэг бүжигчнээр “Алтан уран” бүжгэн жүжгийн мэргэдийн хаан Дармалагийн дүрээр ҮДБЭЧ-ийн бүжигчин А.Батхүү, шилдэг хөгжимчнөөр Л.Мөрдоржийн нэрэмжит үндэсний хөгжимчдийн улсын хоёрдугаар уралдаанд эвэр бүрээ хөгжмөөр тэргүүн байр эзэлсэн ҮДБЭЧ-ын хөгжимчин О.Чинбат, шилдэг дуучнаар 2012 онд БНХАУ-д зохиогдсон дэлхийн дуурийн дуулаачдын 20-р уралдаанд оролцож нэгдүгээр байр эзэлсэн УДБЭТ-ын дуучин Э.Амартүвшин,  шилдэг зураачаар УДЭТ-ын ерөнхий зураач Т.Ганхуяг, шилдэг жүжигчнээр В.Шекспирын “Гамлет” жүжгийн Гамлетын дүрээр УДЭТ-ын жүжигчин С.Болд-Эрдэнэ,Соёлын өвийг өвлөн тээгчээр Монгол хувцас болон түүнийг урлах уламжлалт гар урлалыг хөгжүүлэхэд үнэтэй хувь нэмэр оруулсан “Монгол костюмс”-ын захирал Б.Сувд  нар тус тус шалгарлаа. 

Тус арга хэмжээний үеэр "Мөнгөн мод"-ны эзэн болсон найруулагч З.Батболдтой уулзаж сэтгэгдлийг нь сонслоо.

-    2012 онд хэр их уран бүтээлийн олз омогтой байсан бэ?

-   2012 онд миний уран бүтээлд нилээн том үзэгдэл гарсан. Анх удаа би өөрийн киног аливаа нэгэн газрын үзэл суртлаар хаалгуулсан. Энэ нь Ардчилсан нийгмийн үед тохиолдсон анхны үйл явц болсон байх. Гэтэл "Бурхан өршөө” кино эргээд оны шилдэг уран бүтээл болж тус шагналыг надад авчирлаа. Хоёр сонин үзэгдэл давхацсан нь залуу уран бүтээлчийн хувьд шинэ мэдрэмжийг авчирсан. Би энэ шагналыг авсандаа маш их баяртай байна. Миний уран бүтээлийг үзэгчдийн хүсэлтээр гэж хааж байсан харанхуй шийдвэрийг цагаатгах сайхан шалтаг боллоо гэж ойлгож байна.

-    Сүүлийн үед ямар уран бүтээл дээр ажиллав?

-  Төв Азийн нүүдэлчид төрт улс байгуулсан тухай болон Монголын 2220 гаруй түүхийг харуулсан богино хэмжээний уран сайхны баримтат кино хийсэн. Түүнийгээ саяхан хүлээлгэж өглөө. “Монгол төрийн товчоон” гэдэг нэртэй.

-    Захиалгаар хийсэн кино гэж ойлгож болох уу?

-    Төрийн түүхийн музей санаачилж хийлгүүлж байгаа. Монгол төрийн түүхийг олон түмэнд хүргэх нь чухал гэж бодсоны үндсэн дээр хийсэн.