Аливаа улс гүрний төрийн тэргүүнүүд хоорондоо бэлэг дурсгалын зүйл солилцож, харилцан хүндэтгэл илэрхийлдэг уламжлалтай. Энэхүү уламжлалын дагуу Цагаан ордонд төрөл бүрийн бэлэг дурсгалын зүйл, эд агуурс хуримтлагддаг. Гэвч АНУ-ын хуулийн дагуу олон улсын төр засгийн тэргүүн, дипломат төлөөлөгчдөөс өгсөн бүх зүйлийг улсын өмчид шилжүүлдэг аж. 

АНУ-ын Ерөнхийлөгч Барак Обама төрийн тэргүүнийхээ хувиар бэлгэнд авсан эд зүйлсээ саяхан бүртгүүлж, хадгалуулсан байна. Хамгийн сонирхолтой нь тэрбээр олон улсын удирдагчдаас авсан тэр олон зуун бэлэг дотроос зөвхөн Монгол Улсын Ерөнхийлөгч Ц.Элбэгдоржийн өгсөн номыг өөртөө авч үлдэхийг хүсчээ.

Барак Обамагийн гэр бүл нийт 243 мянган ам.долларын бэлэг дурсгалын зүйл хүлээн авсан байна. Үүний дотор Францын Ерөнхийлөгч асан Николя Саркозигийн өгсөн 7750 ам.долларын үнэтэй гольфийн хэрэгсэл, БНХАУ-ын удирдагч асан Ху Жинтаогийн 9800 ам.долларын үнэ бүхий хүрэл баримал, Бразилийн Рио Де Жанейро мужийн захирагч Сержио Кабралын 40 мянган ам.долларын үнэтэй зураг, Филиппинийн Элчин сайдын өгсөн 1060 ам.долларын хулсан унадаг дугуй гэх мэт эд зүйлс байв. Мөн Николя Саркози, Польшийн Ерөнхий сайд Дональд Туск, БНСУ-ын Ерөнхийлөгч асан Ли Мен Бак нарын бэлэг зонхилж байв.
Эдгээрийн дотроос Цагаан ордны тэргүүн зөвхөн Ерөнхийлөгч Ц.Элбэгдоржийн бэлэглэсэн “Өнөөгийн ертөнцийг үндэслэгч Эзэн Чингис хаан” хэмээх номыг хадгалж үлдэхээр шийдсэн байна.