Уржигдар Малайз улсын Куала Лумпур хотод “Legend Figthing Championship 11” тэмцээн амжилттай болж өндөрлөлөө. Уг тэмцээнд манай улсын гурван тамирчин оролцосноос Б.Дамланпүрэв нь анх удаагийнхаа “legend fighting” тулаанаа хийж, Хятадын тамирчинг боох мэхээр нэгдүгээр үедээ үнэмлэхүй ялалт  байгууллаа.

 Мөн Б.Данаа нь гуравдахь тулаанаа хийж Шинэ Зеландын тамирчинг шүүгчдийн саналаар онооны илт давуугаар буулган авч аваргын бүсийн төлөөх тулаанд нэг  шатаар ахиж, чансаагаа өсгөсөн байна.

 Xарин Legend-11 ММА-н аварга шалгаруулах тэмцээний гол тулаанч Ж.Нарантунгалаг нь баруун гарын гэмтэлтэй байсан ч Япон улсын тамирчинтай эхний хоёр үеийн турш тоглолтыг хошуучлан тулалджээ. Гэвч гуравдугаар үеийн эхэнд баруун хөлөндөө гэмтэл авсаны улмаас тоглолтыг цааш үргэлжлүүлэх боломжгүй болсон гэнэ.
Монголын тамирчдад уг тэмцээнд оролцох эрхийг Монгол Улсын ММА-н менежер, дасгалжуулагч багш Япон улсын иргэн Арая Жүничи нэг жилийн өмнөөс гарцыг нь нээж, зуучилж өгсөн аж.  Энэ нь “Mixed Martial art” буюу чөлөөт тулааныг манай улсад хөгжүүлэхэд онцгой хувь нэмэр оруулсан чухал үйл явдал болсон юм.
Тус тэмцээнийг Малайз Улс дахь Монголын Оюутан Залуучуудын Холбооны удирдлагууд болон оюутан залуус маань очиж үзэн, Монголынхоо тамирчдыг дэмжин, амласан ёсоор сүрийг үзүүлж чадсан хэмээн Малайз Улс дахь МОЗ-ын Холбооны нарийн бичгийн дарга Д.Дэгидбадам онцлон хэллээ.