Саяхан Засгийн тэргүүн,  Туркийн Ерөнхий сайдын айлчлалын үеэр “Манай  Турк” гэж хэлж шүүмжлэлд өртсөн. Гэтэл зөвхөн эрчүүд хөл тавьж болно гэсэн өргөөнд бас нэг сайд нь Тайландын эмэгтэй сайдаар гал асаалгаад л сүйд боллоо.

Төрийн ордны голд “Фортуна”-гийн гэх тодотголтой өргөө баригдаад хоёр жил болж буй. Энэхүү орд цагаан өргөөнд зөвхөн эрэгтэйчүүд хөл тавьж болохоос эмэгтэйчүүд бол шагайх ч эрхгүй.  Ийм цензурыг Эдийн засгийн хөгжлийн сайд Н.Батбаяр өмнөх парламентад гишүүн байхдаа тогтоосон.  Гэвч монгол эмэгтэйд хаалттай шахам байдаг “Фортуна”-гийн эл өргөөнд  Тайландын Вант улсын Ерөнхий сайд, эрхэмсэг хатагтай Йинглак Чинават зочилж, гал асаасан нь сенсаци дагуулаад байгаа юм.  Эмэгтэй хүн хөл тавибал монгол төрийн бодлого алдуурчих юм шигээр ярьж, тайлбарлаж байсан Эдийн засгийн хөгжлийн сайд Н.Батбаяр энэ удаад гэрэл зурагт бууснаар хатагтай Йинглак Чинаватын дэргэд инээд алдчихсан зогсож харагдах юм. 


Монгол эмэгтэйчүүдээ хаалгаар нь ч шагайлгаагүй байж гадны эмэгтэйгээр гал асаалгадаг  Н.Батбаярын ам ажил зөрдөг нь үүнээс харагдлаа.

Эмэгтэй хүн орж болохгүй гэдэг журмаа Эдийн засгийн хөгжлийн сайд цуцалчихав уу, эсвэл хатагтай Йинглак Чинаватын албан тушаалд нь сүрдээд өргөө гэрийнхээ үүдийг сөхөж өгөв үү гэдэг нь их л сонин байна. Энэхүү явдлыг эсэргүүцэж УИХ дахь эмэгтэйчүүдийн бүлэг хийгээд Монголын эмэгтэйчүүд жагсах хэрэгтэй гэх хүмүүс ч олон байна.

Фортуна Н.Батбаяр болон өнөөдрийн монгол улстөрчдийн урагшаа биш хойшоо алхсан, хоцрогдмолыг харуулсан Тайланд Ерөнхий сайд хатагтай Й.Чинаватын гал асааж буйг тойрон долдойлсон зургийг "Гэр өргөө нь өөр" хэмээн хамгаалж буй  зарим хүмүүс ч байна. Гэхдээ энэ үйл явдал монгол эмэгтэй хүн бүрийн эгдүүцлийг хүргэлээ.


Абтай сайн ханы өргөө Богд хаант Монгол Улсын үед Төрийн их өргөө байсан гэдэг. Тэр өргөөнд их ёслол үйлдэн Төрийн тулганд гал асаахдаа арга билгийг төлөөлүүлэн шашин төрийг хослон баригч оройн дээд наймдугаар  Богд Жабзундамба хаан, Эх дагина Дондогдулам хоёр нэг нэг цучил өргөж асааж байсан байхад 21-р зуунд эмэгтэй хүн ойртож болдоггүй тулгатай нэг өргөө, гадаадын эмэгтэй орж болдог бас нэг төрийн өргөөтэй байгаа нь хүртэл хошин шогийн үзэгдэл биш гэж үү.

Эмэгтэй хүн хэдий хаан сэнтийд заларч байгаагүй ч их бага хаадын завсраар төр барьж, хасбуу тамга атгаж байсан гайхамшигт түүх байдаг. Ер нь эх орноо, уламжлалаа дээдлэх үзлийг юм л бол эмэгтэй хүнийг буруутгах замаар илэрхийлэх хандлага газар авч байгааг зогсоох хэрэгтэй юм.