Амьдралд аз жаргал бэлэглэсэн бяцхан үрийнхээ тэнтэр тунтар алхах тэр өдрийг тэсэн ядан хүлээж байна уу. Алхаж сурч байгаа хүүхэд тань замд “хөндөлсөх” нь хичнээн хөөрхөн гээч. Өөрийнхөө бяцхан хөлөөр хорвоог туулахыг нь хурдан хармаар байгаа аав ээжүүдэд бяцхан зөвлөмж бэлтгэлээ.Хүүхдээ анхны алхамд нь хэрхэн “хөтлөх” вэ?
Ихэнх хүүхэд анхныхаа төрсөн өдрийн үеэр алхаж эхэлдэг ч 9-18 сартайн хооронд хэзээ л бол хэзээ алхаж болно . Маш хурдан мөлхөж байгаа хүүхэд аль хэдийн алхаж чадахаар болсон гэсэн үг. Мөн ямар нэг юм түшээд зогсох, шат руу авирах гэж хичээж байвал алхах гэж хичээж буйн дохио юм шүү. Аяндаа алхаж сурах нь тодорхой боловч, шатаар сайн гүйдэг, хэдхэн алхаад л бүдэрч унадаггүй бие даасан болгохын тулд хүүхдээ дадлагажуулах хэрэгтэй. Булчин нь сайн хөгжсөн хүүхэд хурдан хөлд ордог. Харин үүний тулд хүүхдийг төрсөн цагаас нь эхлээд дасгал хийлгэж байгаарай.
- Толгойгоо даах үед нь гэдсээр нь, доошоо харуулж хэвтүүлээд нэрийг нь дуудаарай. Хүүхэд толгойгоо өргөөд дээшээ харах бүрт булчин нь хөгжиж байх болно. Ядраахгүйгээр энэ дасгалыг өдөрт хэд хэдэн удаа хийлгэж байгаарай. Сонирхолтой тоглоомоор анхаарлыг нь татаж, толгойгоо өргөх дасгалыг тогтмол хийлгэх нь чухал.
- Бие дааж суудаг болчихсон үед нь мөн л сонирхолтой тоглоомын тусламжтайгаар хойшоо, ургашаа тэмүүлж мөлхөх алхмыг нь тавьж өгөх хэрэгтэй.
- Зогсож чаддаг болсон үед нь хоёр гараас нь хөтлөөд ганц нэг алхуулаад, аажим аажмаар алхамаа нэмж өгнө. Бага багаар нэг гараас нь барьж хамтдаа алхаад дэмжиж, магтаарай. Аюулгүйн байдлыг хангахын тулд хүүхэд алхаж эхэлж байгаа бол дараах зүйлсийг анхаарах хэрэгтэй.
- Хурц өнцөгтэй ширээ, сандал зэргийн буланд хамгаалалт хийх
- Амархан салдаг, хуваагддаг тулгуургүй тавилгуудыг холдуул
- Хүүхэд хальтирч болзошгүй тул шалан дээрээ хэсэгтээ л дэвсгэр дэвссэн нь дээр. Мөн газарт янз бүрийн сул зүйл тавих хэрэггүй. Алхах замыг нь чөлөөтэй байлгаарай.
- Гал тогооны хутга, хайч, сэрээ, савх гэх мэтийг хүүхдийн гар хүрэхээргүй газар хадгалах аль эсвэл цоожтой болгох
- Цонх, тагтыг тортой болгох
- Ваартай цэцгийн савыг гар хүрэхээргүй газар тавихгүй бол хүүхэд дээр унах, хагархай шил нь гэмтээх аюултай.
- Анх алхаж байгаа хүүхэддээ хатуувтар, бага зэргийн зузаан ултай гутал сонгоорой. Энэ нь хүүхэд тэнцвэрээ олоход тусална.
Хөлд оруулагч авах хэрэгтэй юу?
Олон улсын хүүхдийн эмч нар хөлд оруулагчаас татгалзахыг зөвлөж байна. Канадад хөлд оруулагчаас шалтгаалж жил бүр маш олон хүүхэд гэмтсэн тул одоо хэрэглэхийг хоригложээ. Хэрвээ нууцаар хөлд оруулагч зарсан тохиолдолд 6 сар хорих, эсвэл 100 мянган долларын торгууль төлүүлдэг юм байна. Ер нь хөлд оруулагч нэртэй л болохоос биш хүүхдийг хурдан алхаж сургахад тийм ч их нөлөөтэй биш ажээ. Хүүхэд өөрөө бие даан тогтох чадвартай болж чаддаггүй. Тиймээс хүүхдээ хурдан алхаж сургахыг хүсч байвал хөлд оруулагчаас татгалзаарай.
