Оросын “Зөн билгийн тулаан” нэвтрүүлгийн 13 дахь дугаарын шилдэг оролцогч Фатима Хадуева энэ өдрүүдэд Монголд зочилж байна. Хөдөөгийн тосгодын жүжигчдийн чадварлаг тоглосон шоу гэгддэг нэвтрүүлгээр монголчуудад танил болсон тэрээр өчигдөр Монголд ирснээ мэдэгдэж сэтгүүлчдэд мэдээлэл хийсэн юм. Тэрээр энэ сарын 25-ны өдрийг хүртэл Монголд байх бөгөөд энэ хугацаанд хэд хэдэн ажлыг амжуулах гэнэ. Тухайлбал Улаанбаатар ресторанд 200 хүнтэй тусгай уулзалт хийж лекц уншихаас эхлээд Бат-Сүмбэр асрамжийн газрын хөгшүүдтэй уулзан тэдэнд гарын бэлгээ өгч, сэтгэлийн дэм хайрлах аж.

   200  иргэнтэй уулзан гэрлэн бүрхүүлээ хамгаалах талаар зөвлөгөө өгч, тэдэнтэй хамт хоол идэн, өөрийн шившлэгтэй чулууг бэлэглэж мөн ядарсан хөгшчүүдийн зовлон шаналалаас хуваалцаж байгаа нь сайхан ч түүний Монголд хийж буй ажлын талаар шүүмжилж  хэлэх хэдэн үг байна.

   Үнэндээ өчигдөр болсон хэвлэлийн хурал Фатима Хадуеваг үнэлэх монголчуудын үнэлэмжийг газарт буутал навс унагаад авсан. Түүний зөгнөж мэдэх авъяас болон монголчуудтай уулзах болсон шалтгааны талаар  эргэлзэх, цаашлаад эгдүүцэл төрөх хэд хэдэн шалтгаан хэвлэлийн хурлын үеэр гарсныг зах зухаас нь хүргэе. 

1.    Монголчуудын тэн хагасыг дунд болон ядуу амьдралтай хүмүүс эзэлдгийг Фатима Хадуева эрх биш судалж мэдээд ирсэн байлтай. Гэтэл зөвхөн 200-хан хүнээр уулзалтаа хязгаарлалаа. VIP уулзалтын төлбөр 100 доллар бөгөөд энэ мөнгийг төлөөд түүний лекцийг сонсох хүн Монголд хэр олон билээ. Далай багш ирээд сүсэгтэн олонтой уулзаж, үнэгүй лекц уншдаг. Гэтэл энэ хүүхэн яах нь энэ вэ? гэж ярих хүмүүс ч байна. Эрхэм зөн билигч үнэхээр бусдад туслаж, зовлон шаналалаас нь салгахын төлөө ур чадвар, оюун ухаанаа зориулдаг бол арай олон хүнийг хамарсан, хямд үнэтэй уулзалтыг ядаж УБ паласт зохион байгуулж болох байлаа.

2.   Хамгийн инээдтэй нь түүнтэй уулзахын тулд 100 доллараа төлсөн хүмүүс Фатима Хадуеватай оройн хоол идэж, “Гэрлэн бүрхүүлээ хэрхэн хамгаалах вэ” лекцийг нь сонсох гэнэ. Ингээд л болоо. Аа нээрээ нэг азтан тодруулж 15 минутын туршид уулзан амьдралынх нь зураг, төөргийг хэлж өгөх юм гэсэн. Бас цөөн тооны хэдэн хүн зөн билигчийн хамтаар зургаа даруулна. Зөвхөн Фатима Хадуеваг ойроос харахын тулд хүмүүс 100 доллараа төлсөн гэхээр хайран. Тэнд очиж буй хүмүүс өөрийн үр хүүхэд, эцэг эх, хамаатан садныхаа талаар асуух гэж очиж байгаа шүү дээ. Гэтэл Фатима Хадуева зочидтой зайнаас харьцаж, лекцээ уншиж, шившлэгтэй чулуугаа тараагаад үйл ажиллагаагаа дуусгах гэнэ. Зохион байгуулагчдын хэлж буйгаар энэ нь “Хамгийн шудрага зохион байгуулалт” гэнэ.

3.  Хэвлэлийн хурлын үеэр сурвалжлагч миний бие түүнийг сорьсон нэг асуулт асуусан ч тэрээр хариулж чадсангүй.  Би түүнээс “Та хүмүүсийг хараад ордыг нь шуудхан хэлж өгч байсныг тань нэвтрүүлгээр үзсэн. Яг одоо миний аль ордонд төрснийг хэлэхгүй юу” гэж асуув. Фатима Хадуева хариулахдаа “Би нэг даалгавар дээр хоёр өдөр ажилладаг. Тэгэхээр ойр байгаа хүмүүсийн энергийг мэдрэх хангалттай хугацаа байдаг. Одоо маш олон хүн байгаа учраас анхаарал тавих хэрэгтэй байна. Та бол нумын ордны шинж тэмдгийг агуулсан хүн байна. Өөрөөс тань эмэгтэй ордын шинж ялгарч байна” гэсэн юм. Ингэж тэрээр үхрийн ордны хүнийг нумын ордонд төрсөн хэмээн буруу хэлсэн юм.

4.   Цонхоор харсан юм шиг хэлдэг гэгддэг Фатима Хадуева маш амархан даалгаварт бүдэрсэн нь үнэхээр энерги дутагдсантай нь холбоотой бол нэвтрүүлэг хийсэн хүмүүс түүний ур чадварыг хэтэрхий дэгстүүлж үзүүлсэн бололтой юм.

5.   Тэрээр мөн монголчуудыг ямар нэгэн том шийдвэрийг хүлээсэн байдалтай байна гэж хэлсэн. Фатима Хадуева энэ үгийг удахгүй болох Ерөнхийлөгчийн сонгуультай холбож тайлбарлаж байгаа нь илт байсан юм. Удахгүй болох Ерөнхийлөгчийн сонгуульд хэн ялах талаар асуухад тэрээр мөн л “Залуулаг сэтгэлгээтэй, галын энергитэй, эрх мэдлийн дэргэдэх хүн” гэсэн бөөрөнхий хариултыг өгсөн юм. Ер нь тэр бүх асуултад бөөрөнхий хариулт өгч байлаа.

   Түүний Монгол дахь уулзалтыг зохион байгуулж буй “Их халуун сэтгэл” ТББ болон бусад газрууд ийм байдлаар бизнес хийвэл дараа дараагийн урьж авчирах зөн билигчтэй хэн ч уулзахгүй болов уу?

   Үнэхээр л мундаг зөн билгийн авъяастай хүнтэй хамтдаа хооллож, энергиэс нь хуваалцах алтан боломжийг олгох гээд байгаа бол судалгаатай, олон хүний сайн сайхны төлөө чиглэсэн ажил хиймээрсэн.