“Шинэ цирк” төвөөс Хятадын циркийн жүжигчид, Москвагийн циркийн сургуультай амьтдыг жүжигчдийнх нь хамт урин маргаашнаас зургаадугаар сарын 3-ыг хүртэл “Хөрш гурав” нэртэй тоглолт хийхээр болсон талаар зохион байгуулагчид мэдээлэл хийлээ. Хоёр цагийн хугацаанд тоглогдох үзүүлбэрүүдийн дийлэнхийг Оросын сургуультай амьтдын үзүүлбэр эзлэх юм.

Тус улсын таван баавгай, нэг чоно, гурван нохой, 20 гаруй галуу, хоёр сармагчин, тахиа гээд 40 гаруй сургуультай амьтан ирнэ. Сибирийн хүрэн болоод Канадаас авчирч сургасан том баавгайнууд хоёр хөл дээрээ зогсохоор гурван метр өндөр болдог гэнэ. Тэд хоёр хөл дээрээ зогсоно, дугуй унана, бүжиглэнэ, нарийхан утсан дээр зогсоно. Харин галуунуудын хувьд гулгаж, саадтай төмөр дээгүүр харайж, сургуультай морьдын үзүүлбэрийг дуурайн хийж олныг баясгах юм байна.  Оросын циркийн сургуультай сармагчин, тахианууд ч үзэгчдийг уйдаахгүй гэнэ. 

   “Хөрш гурав” тоглолт Улаанбаатар хотноо тоглогдож дуусаад Дархан Эрдэнэт хотуудаар тоглогдох төлөвлөгөөтэй байгаа аж. Билетийн хувьд хүүхэд /0-4 наснаас дээш/-10.000₮, том хүн-15.000₮, VIP суудал-30.000₮ бөгөөд циркийн кассаар болон “Ачлал” их дэлгүүрийн урд байрлах явуулын кассаар худалдаалж байгаа юм.