Зүгээр л хэрэгжүүлээд үз. Чи саяхан “Хоногийн 24 цаг арай жаахан урт байсан бол сайхан аа” гэж бодоод байсан шүү дээ. Тэгвэл дараах 8 аргыг хэрэглээд 24 цагаасаа өөртөө зориулах цагийг хангалттай гаргаад аваарай.

1. Усанд хурдан ор: Чи яарсан үедээ яаж шүршүүрт ордог билээ? Хурдан ордог ч гэсэн цэв цэвэрхэн болчихсон л гарч ирдэг шүү дээ. Өдөр бүр усанд ордог хугацаагаа нийлүүлээд үзвэл бас л хөөрхөн урт цаг гарч ирнэ. Тиймээс ачаалалтай, олон зүйл амжуулах ёстой үедээ хурдан усанд орж байгаарай. Харин долоо хоногийн сүүлээр хөөс, лаатай ваннд орж өөрийгөө баярлуулах ёстой шүү.

2. Фейсбүүк чатаас гар: Чи цагийг чинь юу “алж” байгааг мэддэг мөртлөө л түүнээс гарч чаддаггүй. Зоригтой бай, хонгор минь. Зөндөө их ажилтай байж хүмүүстэй харилцаад л суух чинь дэндүү амар амгалан хэрэг шүү дээ. Дэлхий чамайг хүлээж чадна аа. Эхлээд амжуулах ёстойгоо л хийчих.

3. Солонгос киног битгий, битгий үз: “Энэ кино бусад солонгос сериалуудаас огт өөр, ёстой гоё юм аа” гэж чи бодож магадгүй. Гэхдээ жилийн дараа гэхэд л чи тэр үедээ үхэн хатан дурлаж, өөр олон зүйл хийж болох байсан цагаа үрэн үрэн үзсэн нөгөө киногоо огтхон ч санахгүй гэдэгт мөрийцсөн ч болно. Бүтэн цаг, тэгээд долоо хоногт долоо гардаг солонгос савангийн дууриудаас татгалз. Үнэхээр үзмээр байвал бүтэнсайнд л сүүлийн ангийг нь үзчих. Чи урьд нь ямар үйл явдлууд өрнөснийг дорхноо ойлгоно доо.

4. Хурдан хийж болох зүйлсийг хурдан л хийчих: Цаг гарздахгүйгээр хурдан хийж болох ажлууд байдаг даа. Гэр цэвэрлэх, маргаашийн семинарт бэлдэх, хэн нэгний ажилд зарагдах гээд түр хугацааны зүйлсийг гялалзтал нь хийж бай. Чиний 24 цагийг үрж байгаа зүйлс тэд лав биш. Тиймээс “Үтэр түргэн хийгээд өгье” гэж хэлээд л шунгинуулчих.

5. Нэг дор, бөөнөөр нь хийх: Хувцсаа нэг өдөр бөөгнүүлж угаа. Супермаркет орохдоо гол хэрэгцээний хүнсээ сараар нь нөөцлөөд авчих. Банш, бууз чимхэхдээ дараа хэрэглэхээр хөргөгчинд илүүг хийж хадгал. Цагийг чинь шимэгчилж хороодог жижиг зүйлсийг нэг дор, бөөнөөр нь хийж байгаарай.

6. Хуваарь гарга: Даваа гарагийн оройг сууж хичээл хийхэд, мягмар гарагийн өдрийг унтаж амрахад, лхагва гарагийн өглөөг найз залуутайгаа хамт гүйхэд гэх мэтчилэнгээр нарийн хуваарь гарга.

7. Маргааш өмсөх хувцсаа өнөө орой бэлд: Зөвхөн хувцсаа гэлтгүй, цүнхээ ч бас бэлдэж тавь. Өглөө нь хувцасны шүүгээгээ харж гиюүрэхгүй байх хичнээн амар гээч. Ялангуяа өчигдөр нь хэрэгтэй зүйлсээ ялгаад хийчихсэн цүнхээ шууд аваад гарах бүр сайхан.

8. Амжихгүй бол “Үгүй” гэж хэл: Толгойтой үснээс олон ажилтай байгаа хэрнээ нэрэлхүү, эсвэл зүгээр л санаа зовсондоо “Би хийчихнэ ээ. Чадна” гэж хэлэх тохиолдол гарч байсан уу? Тэгвэл дараагийн гуйлтад зоригтойгоор татгалзаад уучлал хүсч сур. Амжихгүй л бол амжихгүй. Ачаалал нэмэхийн л нэмэр шүү дээ.