Наадам болдогоороо болоод өнгөрөв. Сонин хачин нь хуучраагүй байна. Шинэ цолтнууды мялаалга, аймгуудын 90 жилийн ой гээд хөвөрч байна. Бас “Энэ жилийн наадамд босоо түрүүлнэ” гэж ам гарсан гэх Улсын Заан М.Өсөхбаярын тухай зарим нэгэн хүмүүс жиг жуг гэцгээх болов. Булган аймгийн Бүрэгхангай сумын харьяат улсын заан М.Өсөхбаяр энэ жилийн наадамд түрүүлнэ гэж ам гарсан ч дөрвийн даваанд өвдөг шороодож түмний шившиг гэж дуудагдахад хүрчээ.

Дээр үеийн зарим ойворгон бөхчүүд ногт ганзаглаж наадамладаг байсан тухай домог их бий. Ард түмний мэдэхээр бол “Гарьд Магнай” кинон дээр Жигмэд хэмээх хүн чанар муутай эр ногт ганзаглаж ирээд Молиго Очирт сайхан шидүүлээд шившиг болоод буцдаг шүү дээ. Ингэж ам гарсан бөхчүүдийг олон түмэн ам дамжуулан ярих дуртай. Наадмын хачир болгож. Энэ жилийн наадмын хачир нь Улсын заан М.Өсөхбаяр боллоо. Тэрээр дээхнэ үед найз нөхөддөө Мөөеө аварга шиг тооцоо хийснээ ярьж байсан нь наадмын өмнө хэвлэлүүдээр гарав. Эсвэл түүнийг чадах гэж тохуурахсан ч байж болох.

Харамсалтай нь М.Өсөхбаяр заан Мөөеө аварга шиг гайхамшигтай тооцоо хийдэггүй нь батлагдав. Хэнтий аймгийн арслан Оюунболдыг даага шүдлэн мэтээр бассан. Өнөөх нь харин харцага болоод талийж өгөв. Өөрийгөө түрүүлж арслан болно гэж мөрөөдсөн тэрээр тавын даваанд улсын начин Б.Сангисүрэн, Б.Батмөнх, Б.Гончигдамба, Р.Пүрэвдагва, Б.Пүрэвсайхан, Ш.Жаргалсайхан, дээш ахивал улсын харцага Т.Өсөх-Ирээдүй, Ө.Бат-Орших нараас амлах тухай мөрөөдсөн. Тэгэхдээ бүр тавын даваанд Ө.Бат-Орших харцагатай таван минутын барилдаан хийнэ гэж бүлтэрсэн бололтой. Бусадтай нь бариа зөрөөн дээр нь тоглолт хийнэ гэж тооцож суусан гэдэг. Гэтэл түүний бариа зөрөөн дээр нь арчаад өнгөрнө гэж бодсон улсын начин Б.Гончигдамба гарьд болоод өөрийнх нь дээр гараад суучихав.  

Зургаагийн даваанд аварга С.Мөнхбатыгаа амла гэж гуйж байгаад мөндийлгөнө гэсэн мөрөөдөлтэй байсан гэсэн. Тэгээд долоо, наймын даваанд бол өөрийг нь тогтоох аавын хүү төв цэнгэлдэхэд байхгүй гэж тооцсон гэж байгаа. Зөвхөн есийн давааг л мөрөөдсөн гэсэн. Энэ мэтээр наадмаас өмнө найз нөхөдөөрөө дамжуулан 25 хоногийн өмнө “Энэ жилийн наадамд босоо түрүүлнэ” гэдэгээ түмэнд зарласан М.Өсөхбаярын онигоо л наадмын ярианы хачир болж давслагдаж байна. Бөх сонирхогчид гүй мөн хөөтэй хүүхдээ. Тийм л амтай юм байх даа, ам гарахаар ингэдэг юм, дөрөв давж чадахгүй байж наадамд түрүүлнэ гэж зарлах хэрэг байсан юм болов уу даа гэх мэтээр М.Өсөхбаяр зааныг яриастай.

Харин найз нөхөд нь зүгээр байгаа хүний өмнөөс дэмий юм хийгээд аз одыг нь гээчихлээ гэж зарим нэгэнийг буруутгаж буй сураг гарлаа.
Ямар ч гэсэн наадамд түрүүлнэ гэж хэвлэл мэдээллийн хэрэгслээр зарлуулсан М.Өсөхбаяр заан дөрвийн даваанд өвдөглөж наадамчдын наргиа боллоо. Ирэх жилийн наадам хүртэл түүний тухай яриа тасрахгүй нь дээ.