Ард олонд туулийг хүндэтгэн дээдлэх үзэлтэй болгох, туулийн судалгааг гүнзгийрүүлэх, үе үеийн туульчдыг сурталчлах зорилготой “Төв Азийн тууль II”  олон улсын симпозиум, их наадам өнөөдөр эхэлж байна.  Уг  наадмыг ССАЖЯ, түүний харьяа Соёлын өвийн төв, ШУА-ын Хэл зохиолын хүрээлэн, ЮНЕСКО-гийн Монголын үндэсний комисс хамтран зохион байгуулж байгаа бөгөөд ирэх лхагва гараг хүртэл Улаанбаатар хотод үргэлжлэх юм.
   Симпозиум, их наадамд Монгол, ОХУ-ын Буриад, Тува, Халимаг, Якут /Саха/,  БНХАУ-ын Шинжааны өөртөө засах орон болон Өвөр Монголын өөртөө засах орон, АНУ, БНСУ, Казакстан, Киргизстан, Тажикстан, Конго зэрэг 15 орны 100 гаруй эрдэмтэн судлаачид оролцох юм байна.
   Мөн симпозиумын үеэр Халимагийн нэрт туульч Цагаанзам, Якутын Олонхоч зэрэг олон туульчид оролцсон хүндэтгэлийн концерт болно.
     Анх 2009 онд “ЮНЕСКО-гийн Яаралтай хамгаалах шаардлагатай соёлын биет бус өвийн жагсаалт”-д  манай улсын соёлын онцгой өв болох туулийг бүртгэж дэлхийд данстай болжээ. Манай улс “Төв Азийн тууль” наадмыг анх 1997 онд зохион байгуулж байсан аж.