Саяхан нэг танил маань гэртээ цахилгаан халаагуур тавьснаар орон сууцанд байгаа мэт тав тухыг мэдрэх болсноо надад сайрхан ярив. Гал түлж үнс тортогтой зууралдахгүй, за тэр түлээ нүүрсний мөнгөнд бол яриангүй хэмнэлттэй гээд л давуу талуудыг нь рекламдаж гарлаа. Тэгэхээр нь би цахилгааны мөнгө ч гэж талийж өгнө биз? асуудаг юм байна. Тэгсэн тэр нөхөр  цахилгааны хөнгөлөлт эдлээд сардаа ойролцоогоор 25 мянган төгрөг төлдөг хариулсан гээд бод доо. Тэрүүхэндээ би үнэмшээгүй ч үнэхээр тийм боломж байдаг  юм билээ.

Нийслэлийн агаарын бохирдлыг бууруулах ажлын хүрээнд 2011 оноос хойш гэр хорооллын айл өрхийн цахилгааны шөнийн хэрэглээний төлбөрийг улсаас 50 хувь хөнгөлдөг болсон. Энэ жилийн цахилгааны хөнгөлөлтийг өнгөрөгч 10 дугаар сарын нэгнээс тооцож эхэлсэн бөгөөд ирэх жилийн тавдугаар сарын 1 хүртэл үргэлжлэх юм.

Дээр хэлсэнчлэн агаарын бохирдлыг бууруулах ажлын нэгээхэн хэсэг болсон энэ ажил анхандаа хязгаарлалтын бүсэд багтсан 50 хороонд хамаатай байв. Харин өнгөрөгч оноос эхлэн 140 хороо буюу Улаанбаатар хотын бүх гэр хорооллын айл өрхүүд цахилгааны хөнгөлөлтөд хамрагдах боломжтой болсон. Өөрөөр хэлбэл  гэр хороололд амьдардаг иргэн та агаарын бохирдлыг бууруулах ажилд гар бие оролцсоныхоо шагналд цахилгааны мөнгөө бага төлнө гэсэн үг юм.

Цахилгааны урамшуулалд хамруулах нөхцөл шалгуур

•    Стандартын шаардлага хангасан дулаалгатай гэр, амины орон сууцтай,
•    Цахилгаан дамжуулах, түгээх сүлжээнд холбогдож цахилгаан халаагуур хэрэглэж байгаа,
•    Бүх төрлийн хийн түлшээр ажилладаг халаалттай,
•    Газрын гүнийн дулаан, нар салхины болон бусад сэргээгдэх эрчим хүчийг ашиглаж байгаа,
•    Стандартын шаардлага хангасан шахмал болон коксон түлш, сайжруулсан зуух, яндангийн шүүлтүүр хэрэглэж байгаа,
•    Байгаль орчинд ээлтэй эрчим хүчний хэмнэлттэй байшин, амины орон сууцтай,
•    Түлш хэмнэх замаар хүлэмжийн хийн ялгарлыг багасгаж, энэ чиглэлийн дотоод, гадаадын тусламж, төсөл хөтөлбөрт хамрагдаж байгаа бол цахилгааны үнийн урамшуулалд хамрагддаг аж.

Хэдэн төгрөг хэмнэх вэ?

Гэрийн халаалтын системийг бүрэн цахилгаанаар шийдсэн, цахилгаан халаагуур бүхий айл өрхийн сард шөнийн цагаар хэрэглэсэн 3000 кМтц хүртэлх цахилгааны төлбөрийг 50 хувиар бууруулдаг. Шөнийн цаг гэдэг нь 18.00 цагаас 09.00 цаг хүртэлх цагуудад хэрэглэсэн цахилгаан хөнгөлөгдөнө гэсэн үг.  

Харин шахмал болон коксон түлш, сайжруулсан зуух, яндангийн шүүлтүүр хэрэглэж байгаа, стандартын шаардлага хангасан дулаалгатай гэр, амины орон сууцтай гэх мэт бусад шаарлагыг хангаж буй өрхүүдийн ахуйн хэрэглээнд хэрэглэсэн 200 кВтц хүртэлх цахилгааны төлбөрийг 50 хувь хөнгөлөх ажээ. Өөрөөр хэлбэл, дүүрэг,  хороодоор дамжуулан худалдаалсан утаагүй зуух, гэрийн дулаалга авч хэрэглэж байгаа айлуудын цахилгааны төлбөр сард дунджаар 20 мянган төгрөг байдаг. Энэ урамшуулалд хамрагдсанаар сар бүр 10 мянган төгрөгийг хэмнэж чадах юм байна.

Бүрдүүлэх баримт, хандах газар

Цахилгааны урамшуулалд хамрагдах нөхцөл шалгуурыг хангасан айл өрх нь өөрийн дүүргийн Агаарын бохирдлыг бууруулах салбар хороонд дээрхи шаардлагуудын аль нэгнийг хангасан гэдгийг батлах хорооны тодорхойлолт, иргэний үнэмлэх, цахилгааны дэвтэр зэргээ авч очин хүсэлт гаргах хэрэгтэй гэнэ.  Дүүргийн агаарын бохирдлыг бууруулах салбар хороо хүсэлт гаргасан айл өрхийг зохих шалгуур үзүүлэлт хангасан эсэхийг шалгаж үзсэний үндсэн дээр цахилгааны урамшуулалд хамруулах тодорхойлолт хийж Нийслэлийн мэргэжлийн хяналтын газраар дүгнэлт гаргуулан “УБЦТС” ТӨХК-д өгөх ажээ. Таны утсанд мэдээлэл ирсэн даруйд дүүргийн Хэрэглэгчдэд үйлчлэх төвд хандан гэрээгээ байгуулсанаар та цахилгааны хөнгөлөлт эдлэх боломжтой болно.