Төрийн соёрхолт дуучин Д.Болдыг хулгайн клипээрээ шагнал хүртлээ гэх шүүмжлэл ойрын хэдэн өдөр цахим ертөнцөд дуулиан тарьж байна. Тэрээр өнгөрсөн амралтын өдрүүдэд болсон “UBS music awards” наадмаас “Би дурламаар байна” клипээрээ хоёр ч шагнал хүртээд буй. Гэтэл “Шилдэг график дизайнтай клип” номинацид шилдгээр шалгарсан уг бүтээл хулгайнх болох нь батлагдаж Төрийн соёрхолт дуучинг маань нэлээдгүй сандаргаад байгаа.

Энэ явдалд дургүйцсэн зарим нь Д.Болдыг тайлбар хийгээд зогсохгүй энэ клипээрээ авсан шагналаа буцааж, ард олноос уучлал гуйх ёстой ч гэцгээж байна. Энэ бүхний хариуд тэрбээр өөрийн твиттер хуудсаараа дамжуулан “Энэ клипийг "DOZ entertainment" 15 сая төгрөгөөр хийж гүйцэтгэсэн. Бас найруулагчаар нь Ш.Доржсүрэн ажилласан. Уучлалтыг би биш надаас мөнгө авч хийсэн ДОЗ-ынхон л гуйх ёстой" гэсэн юм.

Тэгвэл энэ талаар "ДОЗ энтертайнмент"-ын жүжигчин А.Мөнгөнзул байр сууриа илэрхийллээ.  Тэрбээр ярихдаа "Энэ талаар дуучин Д.Болд өөрийнхөө тайлбарыг хийсэн байна лээ. Клип сайн ч, муу ч болсон хүмүүс өөрсдийнхөөрөө хүлээж авна биз. Нэгэнт хамт уран бүтээл дээр ажилласан юм чинь тэр хүнийхээ талаар янз бүрийн зүйл яримааргүй байна" гэлээ.