Шинээр баригдаж байгаа төдийгүй ашиглалтанд ороод удаагүй байгаа орон сууцнуудын метр квадрат зөрж байгаатай холбоотой гомдол саналууд хүрээгээ тэлж байна.

ШӨХТГ-т  гомдол гаргах иргэдийн тоо улам өссөөр байгаа юм. Учир нь иргэд барилгын компаниудад дор хаяж 2-20 метр квадратаар “молигодуулж” байсан гэдгийг ШӨХТГ-аас тогтоогоод байна.

Метр квадрат тутам нь хамгийн хямд компаниуд л гэхэд иргэдэд 2-15 метр квадрат талбайг зөрүүтэй зардаг байсан бол Зайсангийн орчмын айлуудын байрнаас бүр 15-20 метр квадратын зөрүү гарчээ. Тэгэхээр иргэд олон арван сая төгрөгийг барилгын компаниудад зүгээр л “идүүлсэн” байгаа юм.

Өөрөөр хэлбэл, өөрсдөө метр квадрат тутмыг нь үнэлж авсан хэрнээ тухайн байр нь анх авсан метр квадратаасаа дутуу байсныг анзаараагүй өнгөрсөн нь ийм асуудал дагуулж байна. Метр квадратын зөрүүгээс болж иргэд барилгын компаниудад хамгийн багадаа 2.8 саяаас дээш төгрөг завшуулж байсан аж.

Тэгвэл олон нийтийг хамарсан уг хэргийн шалгалтын явц хэрхэн үргэлжилж байгааг ШӨХТГ-ын Хэрэглэгчийн эрхийг хамгаалах хэлтсийн дарга Ч.Батбаатараас тодрууллаа.

-Хэрэглэгчид гомдол гаргахдаа нотлох баримттай ирж байгаа юу?
-Өдөрт бараг 20 өргөдөл, гомдол ирсээр байгаа. Ирж байгаа иргэд тухайн худалдаж авсан байрныхаа метр квадратыг, мэргэжлийн байгууллагаар хэмжүүлээд гаргасан дүгнэлтээ үндэслэж манай дээр гомдол гаргаж ирж байгаа.

-Одоогоор ямар компаниуд дээр олон тооны өргөдөл ирээд байна вэ?
- “Тайгам Алтай” ХХК, “Асар парпартиз”, “Залуус” хороолол, “Ти СИ Ди”, “Гангар” инвест зэрэгт өргөдөл ихээр ирж байна. Нэг барилгын хотхон дээр л гэхэд 2-20 метр дутах жишээний байгаа. Зах зээл дээр метр квадрат ямар үнэтэй байгаа билээ. Гэтэл тухайн барилгын компаниуд стандартын дагуу хэмжилтийг хийдэггүй. Мөн хүчин төгс бус гэрээ хийж хэрэглэгчээ хохироож байгаа.  Шинэчилсэн засгийн газрын хөтөлбрийн хүрээнд иргэдээ орон сууцжуулахын тулд  барилгын компаниудад хөнгөлттэй зээл олгосон. Түүнчлэн барилгын материалын үндсэн түүхий эд болох цемент зэргийн үнийг тогтвортой байлгаж шахсан. Дээрээс нь тухайн барилгын компаниуд барилгаа барьчихаад худалдан авагч үгүй болсон байхад найман хувьтэй зээл гаргаж худалдан авагчийг нь хүртэл бэлдэж өгсөн. Гэтэл манай барилгын компаниуд маань өнгөрсөн найман сард барилгын хомсдлыг далимдуулж метр квадратын үнээ нэмсэн байгаа.

Үндэслэлгүйгээр үнээ нэмсэн хэрнээ худалдан авагчдыг метр квадратаар луйвардана гэдэг байж боломгүй юм.

-Яг одоо хэчнээн компани дээр иргэдээс ирсэн гомдлын дагуу шалгалтын ажиллагааг явуулж байгаа вэ?
-11 компани дээр шалгалтын ажиллагааг явуулаад улсын байцаагчийн албан шаардлагыг хүргүүлчихээд явж байна. Тухайн гаргасан зөрчлөө арилгаж, хэрэглэгчийн хохирлыг барагдуул гэсэн албан шаардлага өгсөн. Тэд энэ сарын 9-ний дотор зөрчлөө арилгах ёстой. Хэрвээ тухайн албан шаардлагыг биелүүлээгүй тохиолдолд хуулийн дагуу арга хэмжээ авна. Энэ шалгалтын Барилга хот байгууллалтын яам, Стандартын хэмжил зүйн газартай хамтарсан шалгалтыг хийж байгаа. Тиймээс хэрэв зөрчлөө арилгаагүй бол барилгын тусгай зөвшөөрлийг цуцлана. Мөн өчигдөр эрүүгийн цагдаагийн газраас энэ хэрэг дээр хамтарч шалгая гэсэн хүсэлтийг өгөөд байгаа.
Түүнчлэн энэ сарын 9-ний дотор компаниуд зөрчлөө арилгаагүй бол хэвлэл мэдээллийн хэрэгслээр компанийн нэрийг, зөрсөн метр квадраттай нь зарлана.

-“Ти СИ Ди” гэх хятад эзэнтэй компанийнхан өнөөдөр зөрчлөө барагдуулна гэсэн үү?
-Анх энэ компанийн талаар гурван иргэн гомдол гаргаж ирсэн. Одоо нэмэгдээд тав болсон. Тэд өнөөдөр гомдол гаргасан иргэдийн зөрчлийг барагдуулж метр квадратынх нь мөнгийг өгнө гэсэн.