Цагдаагийн байгууллагын шинэчлэлийн бодлогыг ард иргэдэд таниулах, ажил мэргэжлийн онцлогийг үнэн бодитоор хүргэх, цагдаа-иргэдийн хамтын ажиллагааг сайжруулах, Монголын гэрэл зургийн түүхийг цагдаагийн алба хаагчдын сэдэвт гэрэл зургаар баяжуулах зорилгоор Цагдаагийн ерөнхий газар, Үндэсний гэрэл зургийн танхимтай хамтран зохион байгуулсан “Амрыг эрье” сэдэвт гэрэл зургийн уралдаан 40 хоногийн хугацаанд зохион байгуулсан. Тэгвэл гэрэл зургийн үзэсгэлэн хэдхэн хормын өмнө нээлтээ амжилттай хийлээ.
Уралдаанд цагдаагийн алба хаагч болон энгийн иргэдээс цагдаагийн өдөр тутмын үүрэгт ажил, ар тал, ахуй амьдралыг тусган харуулсан, зохиомжит болоод бодит гэхчилэн олон төрлийн шинэ санаа шийдэл агуулсан зургийг дэлгэжээ.

Тус уралдаанд цагдаагийн алба хаагчдаас гадна Дорнод, Булган, Архангай, Орхон аймгийн бүтээлч иргэд, гэрэл зургийн Гамма агентлаг, Үндэсний гэрэл зургийн танхимын уран бүтээлчид, УИХ-ын гишүүн М.Зоригт, www.Зөгий.mn сайтын хамт олон  оролцсон юм.
Мөн олны танил болсон гэрэл зурагчин Тошка, Батцэрэн, Харцага, Төрбат зэрэг мэргэжпийн өндөр ур чадвартай уран бүтээлчид бүтээлээ ирүүлэн өрсөлдлөө.

Оролцогч нар ирүүлсэн бүтээл бүртээ өөрсдийн гэсэн тайлбарыг тавьж, зарим нь өглөөний наран мандах агшин, цас хаялсан үдшийг амдан хүлээж гэрэл зургийн аппаратаа шүүрэн авч, шөнийн ээлжээ хүлээлцэх эгэл жирийн алба хаагчид, нутгийн зон олны амар амгалан дор нуруу тэнийн мишээх алба хаагчдын инээмсэглэсэн дүр зураг гэх зэрэг аль болох сонирхолтой, энгийн атлаа торгон агшныг харуулсан зураг авахаар зорьсон нь уралдааныг улам бүр сонирхолтой болгож өгчээ.
Жишээ дурдахад замын хөдөлгөөний аюулгүй байдлыг сахиулах үүрэгт ажилдаа эртлэн орсон замын цагдаагийн алба хаагч хөдөлгөөн сийрэг үед тохижилт үйлчилгээний компанийн үйлчлэгчийн ажилд туслан гудамж цэвэрлэнгээ хууч хөөрч буй дүр зураг, наадамчин олны баяр хөөрийн дундуур хамгаалалтанд гарч үүрэгт ажилдаа чин сэтгэлээсээ зүтгэх цагдаагийн алба хаагчдын агшин, эр цэргийн албандаа ижил заяагаа түшилцсэн ихэр хоёр байлдагчийн тангараг өргөх түүхэн үе гэхчилэн цаг хугацаа, утга санаа, хүсэл мөрөөдлийн хувьд гэгээн бүхнийг агуулсан олон сайхан бүтээлүүд байгаа юм.

Улмаар сонирхуулж хэлэхэд, энэхүү үзэсгэлэнд анхны цагдаагийн алба хаагчийн хувцас хэрэглэлээс эхлээд орчин цагийн алба хаагчдын хувцасны загварыг дэлгэлээ.

Дашрамд дуулгахад 1992 онд Нийгмийн аюулаас хамгаалах яам татан буугдсанаар ЦЕГ-ын даргын 1992 оны 59 тоот тушаалаар цагдаагийн музей болж, он цагийн түүхээр үзмэрүүдээ баяжуулан үйл ажиллагаагаа явуулж ирсэн түүхтэй.
Үзэсгэлэнд тавигдсан эдгээр бүтээлийг мөн нийслэл, дүүргүүдийн цагдаагийн газар, хэлтсүүдээр аялуулж алба хаагчид болон тухайн хэлтсүүдээр үйлчлүүлж байгаа иргэдэд сонирхуулах юм.