Төрийн соёрхолт дуучин Д.Болдын "Хулгайн хэрэг" өнөөг хэр нь намжсангүй. Харин ч цөөхөн хэдэн урлагийнхныг маань шуудайд хийсэн үхрийн эвэр лугаа хагаралдуулж орхив бололтой. 

Болсон явдлыг нэхэн сануулбал тэрээр саяхан болсон “UBS music awards” наадмаас “Би дурламаар байна” клипээрээ “Шилдэг график дизайнтай клип” номинацийн шагналыг хүртсэн билээ.  Гэтэл энэ клипийг хэд хэдэн дуу, клип, рекламаас хулгайлсан нь батлагдаж Төрийн соёрхолт дуучинг маань "Хулгайч" нэрийг зүүхэд хүргэсэн юм.

Ичсэн хүн, хүн ална гэгчээр мань хүн шууд л клип хийсэн "DOZ" энтертаймент руу бүх бурууг чихээд өнгөрөхийг оролдсон боловч энэ нь бусдад буруугаа нялзаах гэсэн башир арга хэмээн олны дургүйцлийг хүргээд авсан.

Харин энэ талаар “DOZ intertainment”-ийн жүжигчин А.Мөнгөнзул “Бид уран бүтээл дээр хамтран ажилласан нь үнэн. Дуучин Д.Болд биднээс хариуцлагыг нэх гэж байр сууриа илэрхийлсэн байна лээ. Бидний хувьд хөлс, хөдөлмөр гаргаж уг дууг клипжүүлсэн. Клип сайн ч, муу ч болсон хүмүүс өөрсдийнхөөрөө хүлээж авна биз. Нэгэнт хамт уран бүтээл дээр ажилласан юм чинь тэр хүнийхээ талаар янз бүрийн зүйл яримааргүй байна” хэмээн тайлбар хийхээс татгалзсаар байгаа.

Нэг үхрийн эвэр доргивол мянган үхрийн эвэр доргидог заншлаар хөгжмийн урлагт хүчин зүтгэдэг бүхий л уран бүтээлчид энэ хэрэгт байр сууриа илэрхийлээд эхэлсэн бөгөөд Төрийн соёрхолтыг  хуулсан, хуулбарлаагүй гэх маргаан одоо ч үргэлжилсээр.

Тухайлбал сэтгүүлч, соёлын гавьяат зүтгэлтэн Г.Золжаргал,  “ON and Off” продакшны захирал С.Ононбат, “Харанга”  хамтлагийн  продюсер, хөгжмийн зохиолч Ц.Чулуунбат, Төрийн соёрхолт, хөгжмийн зохиолч Б.Шарав нар түүнийг хатуухан шүүмжлээд авсан бол хулгайн дууг үзэж чаддаггүй гэх гитарчин Өөжгий “Д.Болд руу бүгд л хэд хоног дайрлаа. Ингэхэд Болдод яг ямар буруу байгааг ойлгохгүй л байна шүү залуусаа. Энэ дууны клип хуулбар байсан юм бол Болд тэрэнд юугаараа буруутай юм? Хийсэн улсууд нь бэлээхэн байж байхад… Юм хийж ид бүтээж яваа нэгнийгээ муухай монгол зангаар доромжлохоо больё оо хүмүүсээ” хэмээн өмөөрөөд авсан юм.

Түүнчлэн "Hero" энтертайментийн захирал, найруулагч н.Баатар "Ийм клип тодруулсан тэр шүүгчдийн л буруу шүү дээ. Бид бүх зүйл дээр мэргэжлийн хандах цаг болжээ" хэмээн зохион байгуулагч талыг шүүмжлэх, сэрэмжлэхийн завсарт голыг нь олоод хэлчихэв.

Энэ бүхэнтэй зэрэгцэн түүнийг Оюуны өмчийн газар болон ШӨХТГ-т өгч шалгуулах талаар яригдаж эхэлсэн ч хэн нэгэн гомдол гаргаагүй нөхцөлд шалгах үндэслэлгүй гэдгийг хэлж байсан. Гэтэл энэ хэрэг савнаасаа хальж Төрийн соёрхолт дуучин Д.Болдыг Дэлхийн оюуны өмчийн байгууллагад шалгуулахаар болсон тухай дуулдаж эхэллээ. Тодруулбал "Муухай" Монгол зангаараа элэг нэгтнүүд нь түүнийг  санааг нь хулгайлсан гэх уран бүтээлчдэд "Ольсоноор" тэд Д.Болдыг Дэлхийн оюуны өмчийн байгууллагаар шалгуулахаар болсон сурагтай. Хэрэв энэ хэрэг батлагдвал Д.Болд хэдэн ч сая долларын нөхөн төлбөрт унаж магадгүй байгаа юм.

Эцэст нь гэж хэлэхэд Төрийн соёрхолт хүний хариуцлагыг ухамсарлаагүйнхээ төлөөсөнд Д.Болд хэр ихийг алдах вэ гэдэг нь одоо цаг хугацааны л асуудал болон үлдлээ.