Дижитал хамтлагийн дуучин Эрка буюу Г.Эрдэнэбилэг хүүгийнхээ ангийн бяцхан охинд туслахаар шийджээ. Охин ээжтэйгээ амьдардаг бөгөөд түүний ээж сэтгэцийн хувьд өөрчлөлттэй, ажил хийх чадваргүй аж. Тиймээс охин өөрийгөө болон ээжийгээ Гандантэгчинлэн хийдэд будаа зарж тэжээх болсон байна.

Эрка энэ талаар өөрийн фэйсбүүк хуудаснаа “Манай хүүгийн ангид нэг охин байдаг гэнэ. Ээжтэйгээ л амьдардаг. Ээж нь сэтгэцийн өөрчлөлтэй болохоор ажилд авах газар олддоггүй. Тэр бяцхан охин хичээлээ тараад Гандангийн хажуугийн дэлгүүрээс будаа зээлж аваад тэр хавьд зарж олсон мөнгөөрөө ээждээ болон өөртөө сургуулийнхаа гуанзнаас пирошки авч идэж өдрийг өнгөрөөдөг. Гэрийнх нь хана нь хугарч, нэвт гэрэлтдэг. Гадаа хэдэн хэмийн хүйтэн байна гэрт нь яг тийм байдаг болохоор Бөмбөгөр орж дулаацдаг гэнэ. Тэгсэн хэрнээ хөөрхий охин хичээлээ их хичээнгүй сайн хийдэг гэсэн. Энэ охинд тусламаар байна” гэжээ.

Ийнхүү пост үлдээсний дараа түүнийг олон хүн дэмжихээ илэрхийлсэн бөгөөд өнөөдөр тэрээр охины гэрт очсон байна.  Тэрээр энэ талаараа “Бяцхан охины багштай хамт гэрт нь очлоо. Нөхцөл байдал үнэхээр хүнд байна. Туслахыг хүссэн хүмүүс өнөө орой буюу 2013 оны 12 дугаар сарын 20-ны 19.00 цагт 96 дугаар сургуулийн байранд цуглая. Ярилцах асуудал маш их байна” хэмээн охинд туслахыг хүссэн бүх хүмүүст уулзах хүсэлтээ илэрхийсэн байна.

Хэдий хүнд хэцүү амьдралд нухлагдсан ч сурч хөдөлмөрлөх хүсэл тэмүүлэл дүүрэн бяцхан охинд та бүхэн туслахыг хүсвэл өнөө орой 96 дугаар сургуульд дуучин Эркатай уулзаж болох нээ. Ингээд түүний охины гэрт авсан  гэрэл зургуудыг хүргье.