Өнөөдөр төрийн ордон хөл хөдөлгөөн ихтэй байна. УИХ-ын чуулганаар МАН-ын бүлгээс тавьсан Эдийн засгийн хөгжлийн сайд Н.Батбаяр, Сангийн сайд Н.Улаан нарыг огцруулах асуудлыг хэлэлцэж байгаа бол Төрийн ордны гадна МАН-ын Шинэчлэлийн хорооныхон мөн хоёр сайдыг огцруулахыг шаардан жагсаж байна. Мөн МАН-ын бүлгийн дарга С.Бямбацогт ажлын өрөөнийхөө гадна гацуур засаж, бараа бүтээгдэхүүний үнийн өсөлтийг харуулсан хавтсан чимэглэлээр чимэглээд байгаа юм. Олон хүний сонирхлыг татсан тус гацуур өнөөдөр ордонд ёстой олны анхаарлын төвд байж чадаж байна. Тус гацуурын дэргэд зургаа авахуулах гэсэн хүмүүсийн тоо ч олширчээ. Ордонд орж ирсэн иргэд, сэтгүүлчид, гишүүдийн туслахууд, гишүүд ч энэ модны дэргэд тасралтгүй зургаа авахуулсаар байна. Энэ нь ордны хамгаалалтынханд ихээхэн чирэгдэл учруулж байгаа бололтой.

Энэ оны үнийн өсөлтийн гэрч болсон тус гацуурын дэргэд зургаа авахуулах нь хожим нийгмийн чухал үеийн гэрч болсны илрэл болох биз.