Улсын Дээд шүүхийн Иргэний хэргийн танхимаас шүүхийн зохион байгуулалтын өөрчлөлт болон цаг үеийн асуудалтай холбоотойгоор зарим шүүхийн шүүгч нартай 2013 оны 12 дугаар сарын 23-ны өдөр уулзалт хийлээ.

Уулзалтад Улсын Дээд шүүхийн Иргэний хэргийн танхимын тэргүүн Б.Ундрах, Иргэний хэргийн давж заалдах шатны 10 дугаар шүүхийн шүүгч П.Золзаяа,  Дүүргийн Иргэний хэргийн анхан шатны 1 дүгээр шүүхийн шүүгч Б.Баатар,  2 дугаар шүүхийн шүүгч В.Жавхлан нар оролцсон байна.

Шүүхийн зохион байгуулалтын өөрчлөлттэй холбоотойгоор давж заалдах шатны 10 дугаар шүүх, анхан шатны иргэний 1,2 дугаар  шүүхийн үйл ажиллагаа хэрхэн зохион байгуулагдсан, бодит нөхцөл байдал ямар байгаа талаар  шүүгч П.Золзаяа,  Б.Баатар, В.Жавхлан нар Танхимын тэргүүнд танилцуулжээ.

Энэхүү зохион байгуулалтын өөрчлөлт иргэний хэрэг шүүхэд хянан шийдвэрлэх ажиллагаанд сөргөөр нөлөөлөх  учиргүйг Улсын Дээд шүүхийн танхимын тэргүүн Б.Ундрах тэмдэглээд улсын  хэмжээний  дийлэнх хэргийг шийдвэрлэдэг  эдгээр шүүхийн үйл ажиллагааг ил тод, нээлттэй, хүртээмжтэй   байдлаар  хэвийн явуулах асуудалд өмнөхөөс илүү  анхаарч ажиллахыг захисан байна.

Мөн нэхэмжлэлийг хүлээн авахдаа шүүхийн болон хэргийн харьяаллыг анхаарах нь чухал боловч  нэхэмжлэлд тухайн шүүхийг  Шүүх байгуулах тухай хуульд заасан  байдлаар нэрлэн бичээгүй зэрэг нь нэхэмжлэлийг хүлээн авахгүй байх, буцаах, хүлээн авахаас татгалзах үндэслэл биш гэдгийг   сануулжээ.

Түүнчлэн тэмдэгтийн хураамж төлөх данс, хэмжээ зэрэгт  улсын хэмжээнд ямар нэг өөрчлөлт ороогүйг онцлоод Ерөнхий шүүгчийн бүрэн эрхэд хамаарах, Иргэний хэрэг хянан шийдвэрлэх тухай хуульд заасан ажиллагаа явуулахдаа уг  хуульд байхгүй нэр томьёо хэрэглэхгүй байхыг  анхааруулсан байна.

Шүүгчдийн  зөвлөгөөнөөр  шийдвэрлэх асуудлыг тухай бүрт нь хэлэлцэж,  гарсан тогтоол болон  түүний дагуу гаргах эрхийн актыг   гарын үсэг зурж , тамга тэмдэг дарах  байдлаар   албажуулах нь зохимжтой гэж үзэж байгаагаа мөн илэрхийлжээ.

Үүнээс гадна  шүүх хуралдааны зар болон хянан шийдвэрлэсэн хэргийн  тоймыг “Монгол улсын шүүхийн шийдвэрийн цахим сан”-д тогтмол  байршуулж хэвших нь иргэний хэрэг хянан шийдвэрлэх ажиллагааны мэтгэлцэх зарчмыг хэрэгжүүлэх нөхцөл  болохыг  тэмдэглэж, хэрэг хянан шийдвэрлэх ажиллагааны хугацааг баримтлах, шүүх хуралдааныг хуульд заагаагүй үндэслэлээр  хойшлуулах асуудлыг зогсоох, 2013 оноос өмнө хүлээн авсан иргэний хэргийг шийдвэрлэж дуусгах асуудлыг  чухалчилсан байна.