Г. Алтанхүү гэгчийн гарт амиа алдсан 21 настай бүсгүй монгол хүн бүрийн сэтгэлийг шимшрүүлж байна. Гэтэл Шүүх эмнэлгийн шинжээчид хохирогчийн үхэлд хүргэсэн шалтгаан нь ”Цөсний цоргоны үрэвсэл” бөгөөд “Гадны нөлөөгүй” гэж дүгнэж, хэргийн жинхэнэ эзэн ял зэмгүй өнгөрөхөөр болж хөөрхий бүсгүйн ясыг өндөлзүүлээд авлаа.

Хэн ч харсан илэрхий энэ хэргийн үнэн мөнийг олохыг олон нийт шаардаж эхэлсэн ч Шүүх эмнэлгийн шинжээчдийн дүгнэлт хариултыг төөрөлдүүлэв.

Хэдэн өдрийн турш харгис этгээдийн зодуурыг амссан охин гэмтлийн эмнэлэгт үхлүүт ирэхэд эмч нар “Дотор эрхтнээс нь нэг ч эрүүл эрхтэн үлдээгүй, бүгд няцарсан, ямар ч найдваргүй” гэж хэлсэн байдаг. Гадны нөлөөтэй зодуулж нас барсан нь олонд ил, мөн үүнийг илчлэх бүх баримт сэлт талийгаачийн ар гэрийхэнд байгааг үл тоон байж дүгнэлтэдээ гадны нөлөөтэй байсан талаар үг битгий хэл үсэг ч оруулаагүй нь эмч нар мөнгөтэй хүний талд ажилладаг гэсэн таамгыг бүр лавшруулж орхив.

Үхлийн шалтгаан нь гаднын нөлөөтэй нь илэрхий байхад хөөрхий бүсгүйг "өвчний улмаас" нас барсан гэж шүүх эмнэлгийн дүгнэлт гарсанд ар гэрийнхэн нь гомдолтой байна.

Тэгвэл шинжээчдийн дүгнэлтэд Монгол Улсын Ерөнхийлөгч Ц.Элбэгдорж бухимдаж буйгаа илэрхийлэв.

Тэрбээр “Зохих хүмүүст нягтлахыг санууллаа. Төрийг засъя, хүчирхийлэлийг зогсооё гэснийг ингэж эсэргүүцэв үү” хэмээн санал бодлоо илэрхийлжээ.

Мөн тус хэрэгт МАН, Иргэний нийгмийн 10 байгууллага оролцохоо мэдэгдэв. Ингээд нийгмийн нөлөө бүхий гурван том субьект тус хэрэг дээр ажиллахаар болж байна. МАН-ынхан Шүүх эмнэлэгийн эмч нарын дүгнэлтийг дахин нягтлах шаардлагатай хэмээн нэмж шинжээч томилуулахаар ажиллаж байгаа аж. Мөн энэ асуудлаар  холбогдох газарт нь дуу хоолойгоо хүргэх юм байна. Харин хүний эрхийн төлөө ажилладаг иргэний нийгмийн байгууллагууд ч эмч нарын дүгнэлтийн эсрэг босохоор болжээ. Тус хэрэгт өмгөөлөгчөөр ажиллаж буй М.Ичинноров өөрөө иргэний нийгмийн байгууллагын идэвхтэй гишүүн бөгөөд тэрбээр энэ ажлыг санаачилж байгаа аж. Тэд худал дүгнэлт гаргасан гэх эмч нарыг олон нийтэд ил болгож, хариуцлага тооцон, уг хэргийн үнэн мөнийг гаргах хүртэл ажиллах юм байна.

Ерөнхийлөгч тус хэрэгт өөрийн дуу хоолойгоо хүргэж, хэргийн үнэн зөвийг тогтоолгохоор холбогдох хүмүүст үүрэг өглөө. Тэрбээр ингэснээр дахин шудрага үнэний төлөө дуугарч чадав. Харин Ерөнхийлөгчийг санаа бодлоо илэрхийлнэ цаашлаад уг хэрэгт оролцоно чинээ төсөөлөгүй шүүх эмнэлэгийн шинжээчид өчигдөр хэрхэн сандарсан бол.

Харгис хэрцгий этгээдийн гарт зовж, тарчилж буй охид бүсгүйчүүддээ төр авралын гараа сунгаж эхэлж буй нь цаашид зөв жишиг тогтохын илрэл. Мөнгөтэй хүмүүс хүний амиар тоглосон ч цэвэрхэн үлдэж чаддаггүйг Ерөнхийлөгчийн санаачилга ажил хэрэг болж харуулах ёстой. Монголын төр охид, бүсгүйчүүдээ хамгаалж эхэлснийг хэрцгий нөхрүүдэд харуулаад өг.

Манай улсад 2013 онд 2000 гаруй хүн гэр бүлийн хүчирхийлэлд, 300 гаруй охид бүсгүйчүүд бэлгийн хүчирхийлэлд өртсөн гэж албан ёсоор бүртгэгджээ. Нэг хүний цаана  нуугдмал хүчирхийлэлд өртсөн наад зах нь арван хүн байна гэж тооцвол энэ тоо 23 мянга болж байгаа талаар Ерөнхийлөгч Ц.Элбэгдорж “Гэр бүлийн хүчирхийлэл бол хүний асуудал. Хүн л энэ аюулд цэг тавьж чадна” илтгэлдээ дурдав.

Мөн гэр бүлийн хүчирхийллийн улмаас 43 эмэгтэй амиа алдсан байна. Мөн хөдөө бөглүү газарт олон эмэгтэй нөхрийнхөө зодуур, мөлжлөгийг амсаж суугаа.

Эмгэнэлтэй тоо бий шүү. Хүн амины хэргээр ял эдэлж байгаа бүсгүйчүүдийн 80 хувь нь нөхрийнхөө аминд хүрсэн хүүхнүүд байдаг аж. Олон жилийн яргалал, дарамт, зодуурыг тэсч дааж явдаг ч эцсийн мөчид амиа хамгаалах , үрээ хамгаалах эм зөн нь тэднийг ийм алхам хийхэд хүргэсэн байдаг юм.

Асуудал нэг бол амиа алдаж, эсвэл бусдын аминд хүрч дуусдаг гашуун үнэн бий. Гэхдээ үүнийг шийдэх гарц бас бий.